សារព័ត៌មាន នគរវត្ត តែងតែនាំមុខគេជានិច្ច
នៅក្នុងការបាញ់សាកល្បងមីស៊ីលរយៈចម្ងាយខ្លីពីរគ្រាប់កាលពីរសៀលថ្ងៃទី២៨ ខែវិច្ឆិកា មេដឹកនាំកូរ៉េខាងជើង គីម ជុងអ៊ុន បានទៅត្រួតពិនិត្យការសាកល្បងដោយផ្ទាល់ ហើយលោកបង្ហាញពីការពេញចិត្តយ៉ាងខ្លាំង ដល់ជោគជ័យ ទាំងនោះ។
កន្លងមកទីបញ្ជាការកងទ័ពកូរ៉េខាងត្បូង បានបញ្ជាក់ថា កូរ៉េខាងជើងបានសាកល្បងមីស៊ីល នៅវេលាម៉ោង១៦ និង៥៩នាទី រសៀលថ្ងៃទី២៨ ខែវិច្ឆិកា ហើយមីស៊ីលនោះបានធ្លាក់នៅសមុទ្រជប៉ុន។ ចំណែកភាគីជប៉ុនវិញបានបញ្ជាក់ថាមីស៊ីលនោះមិនបានហោះចូលដែនអាកាសជប៉ុន ឬធ្លាក់ក្នុងដែនសមុទ្រជប៉ុន នោះឡើយ ។ នេះគឺជាលើកទី១២ហើយ ការបាញ់មីស៊ីលផ្លោងដូច្នេះរបស់កូរ៉េខាងជើង ចាប់តាំងពីខែឧសភា ឆ្នាំ២០១៩មក ។
យោងតាមការចេញផ្សាយរបស់កាសែត យ៉ុនហាប នៅថ្ងៃទី២៩ ខែវិច្ឆិកា ឆ្នាំ២០១៩ បានផ្សាយថា កូរ៉េខាងជើងបានបាញ់សាកល្បងប្រកបដោយជោគជ័យកាំជ្រួចមីស៊ីលធុនធំ ។ ការបាញ់សាកល្បងនេះ ស្ថិតក្រោមការត្រួតពិនិត្យដោយផ្ទាល់ពីមេដឹកនាំ គីម ជុងអ៊ុន ។
មេដឹកនាំគីម ជុងអ៊ុន បានបង្ហាញការពេញចិត្តពេញថ្លើមយ៉ាងខ្លាំងចំពោះលទ្ធផលសាកល្បងប្រកបដោយជោគជ័យនេះ ។ សារព័ត៌មានកូរ៉េខាងជើង KCNA បានផ្សាយថា ក្រៅពីមេដឹកនាំប្រទេសត្រួតពិនិត្យការបាញ់សាកល្បងមីស៊ីល នៅមានមន្ត្រីជាន់ខ្ពស់ជាច្រើនរូបទៀតមកពីគណបក្សពលករកូរ៉េខាងជើង រួមទាំងមន្ត្រីយោធាជាន់ខ្ពស់ជាច្រើនរូបផងដែរ ។
កាលពីថ្ងៃទី២៧ ខែវិច្ឆិកា ឆ្នាំ២០១៩ នាយអគ្គសេនាធិការចម្រុះកូរ៉េខាងត្បូង បានបញ្ជាក់ថា ខ្លួនបានពើបប្រទះឃើញ ប្រព័ន្ធមីស៊ីលផ្លោងរយៈចម្ងាយខ្លីពីរគ្រាប់ ត្រូវបានបាញ់បង្ហោះចេញពីទីក្រុងកំពង់ផែ Yeonpo ខេត្ត South Hamgyong ភាគខាងកើតរបស់ប្រទេសកូរ៉េខាងជើង ឆ្ពោះទៅកាន់សមុទ្រខាងកើត ( សមុទ្រជប៉ុន) ហើយដែលអាចសន្មត់បានថា ជាប្រភេទមីស៊ីលមានសមត្ថភាពខ្លាំង ។ មីស៊ីលផ្លោងទាំងពីរគ្រាប់នេះ ហោះហើរបានរយៈចម្ងាយ៣៨០គីឡូម៉ែត្រ និងក្នុងរយៈកម្ពស់៩៧គីឡូម៉ែត្រ ។
មីស៊ីលផ្លោងទាំងនេះ ហាក់ដូចជាបានធ្លាក់នៅខាងក្រៅតំបន់សេដ្ឋកិច្ចផ្ដាច់មុខរបស់ជប៉ុននោះទេ ។ នេះគឺជាការបាញ់សាកល្បងមីស៊ីលលើកទី១២ហើយ របស់កូរ៉េខាងជើង ចាប់តាំងពីខែឧសភា ឆ្នាំ២០១៩ រៀងរហូតមកដល់ពេលនេះ ។ កាលពីចុងខែតុលា ទីក្រុងព្យុងយ៉ាង បានបាញ់មីស៊ីលផ្លោងពីរគ្រាប់ ហោះហើរបានរយៈចម្ងាយ៣៧០គីឡូម៉ែត្រ ក្នុងកម្ពស់៩០គីឡូម៉ែត្រ ឆ្ពោះទៅកាន់តំបន់សមុទ្រជប៉ុន។
ការបាញ់ផ្លោងមីស៊ីលថ្មីៗទាំងនេះ របស់កូរ៉េខាងជើងបានធ្វើឲ្យមានការរិះគន់ពីប្រទេសលោកខាងលិច ។ ជាពិសេស ប្រទេសអាល្លឺម៉ង់បានអំពាវនាវឲ្យកូរ៉េខាងជើងចាប់ផ្ដើមចរចាឡើងវិញ ជាមួយសហរដ្ឋអាមេរិក ស្ដីអំពីការរំសាយអាវុធរបស់ខ្លួន ។ ចក្រភពអង់គ្លេស ក៏បានជំរុញឲ្យ កូរ៉េខាងជើងបញ្ឈប់ការបាញ់សាកល្បងមីស៊ីល និងបន្តកិច្ចចរចាកិច្ចព្រមព្រៀងរំសាយអាវុធនុយក្លេអ៊ែរឡើងវិញជាមួយសហរដ្ឋអាមេរិក ៕
កន្លងមកថ្មី ប្រេសិតបរមាណូកំពូលរបស់កូរ៉េខាងជើងបាននិយាយថា សហរដ្ឋអាមេរិកបានផ្តល់សំណើរសម្រាប់កិច្ចពិភាក្សាជាមួយកូរ៉េខាងជើងនៅក្នុងខែធ្នូ ខាងមុខនេះ ប៉ុន្តែទីក្រុងព្យុងយ៉ាងមានឆន្ទៈចូលរួមលុះត្រាតែទីក្រុងវ៉ាស៊ីនតោនបង្ហាញនូវដំណោះស្រាយជាមូលដ្ឋានមួយ ដើម្បីដោះស្រាយភាពជាប់គាំងបរមាណូ។
នៅក្នុងសេចក្តីថ្លែងការណ៍មួយដែលធ្វើឡើងដោយទីភ្នាក់ងារព័ត៌មានកូរ៉េ ( KCNA)ដែលជាប្រធានក្រុមចរចាបរមាណូរបស់កូរ៉េខាងជើង លោក Kim Myong-gil បានបង្ហាញថា សមភាគីសហរដ្ឋអាមេរិក គឺលោក Stephen Biegun ថ្មីៗនេះបានស្នើសុំរៀបចំកិច្ចប្រជុំនៅខែក្រោយតាមរយៈប្រទេសទីបី។
លោក គីម បាននិយាយថា «ប្រសិនបើកិច្ចពិភាក្សាស្វែងរកដំណោះស្រាយនៃបញ្ហាអាចធ្វើទៅបាន យើងត្រៀមខ្លួនជួបជាមួយសហរដ្ឋអាមេរិកនៅគ្រប់ទីកន្លែង និងគ្រប់ពេលវេលា»។
ប៉ុន្តែលោកក៏បានជំរុញឱ្យសហរដ្ឋអាមេរិក ដាក់ចេញនូវដំណោះស្រាយជាមូលដ្ឋាន ចំពោះគោលនយោបាយអរិភាពរបស់ទីក្រុងវ៉ាស៊ីនតោនឆ្ពោះទៅក្រុងព្យុងយ៉ាងមុនពេលអង្គុយជជែកពិភាក្សា។
ប្រេសិតរូបនេះបានព្រមានថា លោកមិនមានឆន្ទៈក្នុងការធ្វើកិច្ចចរចាអ្វីនោះទេ ប្រសិនបើសហរដ្ឋ អាមេរិកព្យាយាម «អំពាវនាវ» ដល់កូរ៉េខាងជើងដើម្បីឱ្យផុតកាលបរិច្ឆេទកំណត់ដូចដែលបានធ្វើនៅក្នុងកិច្ចចរចាកម្រិតការងាររបស់ពួកគេនៅក្នុងទីក្រុង Stockholm កាលពីខែតុលា។
ទីក្រុងវ៉ាស៊ីនតោន និងទីក្រុងព្យុងយ៉ាង បានបន្តកិច្ចចរចានៅរដ្ឋធានីនៃប្រទេសស៊ុយអ៊ែតកាលពីខែមុន បន្ទាប់ពីមានភាពជាប់គាំងជាច្រើនខែ ប៉ុន្តែកិច្ចចរចាបានបែកបាក់ ដោយកូរ៉េខាងជើងបានចោទប្រកាន់សហរដ្ឋអាមេរិកថា មានភាពបរាជ័យក្នុងការធ្វើសំណើថ្មី។
មេដឹកនាំកូរ៉េខាងជើង លោក គីម ជុងអ៊ុន បានកំណត់កាលបរិច្ឆេទនៅចុងឆ្នាំនេះសម្រាប់សហរដ្ឋ អាមេរិកដើម្បីដាក់សំណើស្តីពីការយល់ព្រមរបស់កូរ៉េខាងជើង ក្នុងការដកហូតអាវុធបរមាណូជាថ្នូរនឹងការដោះដូរសម្បទានសេដ្ឋកិច្ច និងនយោបាយ។
កិច្ចចរចានេះ គឺនៅទ្រឹងចាប់តាំងពីជំនួបកំពូលរវាងលោក គីម និងប្រធានាធិបតីសហរដ្ឋអាមេរិក លោក ដូណាល់ ត្រាំ បានបញ្ចប់ដោយគ្មានកិច្ចព្រមព្រៀងអ្វីសោះកាលពីខែកុម្ភៈ នៅក្នុងប្រទេសវៀតណាម៕
