សារព័ត៌មាន នគរវត្ត តែងតែនាំមុខគេជានិច្ច
សារព័ត៌មានជប៉ុន បានផ្សាយថាមានករណីបាក់ព្រិល រអិលពីកំពូលភ្នំនៅលើកោះហ៊ុកកៃដូកាលពីថ្ងៃទី៣០ ខែមករា បណ្តាលឲ្យមានអ្នកស្លាប់ និងរបួសជិត១០នាក់ ។
ជនរង្គ្រោះដោយករណីបាក់ព្រិលភាគច្រើនជាជនបរទេសទៅជិះស្កីលើព្រិល នៅតំបន់រម្មណីយដ្ឋានជិះស្គីលើទឹកកក ។ តាមប្រភពព័ត៌មានមានជនបរទេស៨នាក់ទៅជិះស្គីនៅទីនោះ ។
ហេតុការណ៍បាក់ផ្ទាំងព្រិលទឹកកកនេះ បានកើតឡើងនៅពេលដែលក្រុមអ្នកជិះស្គីទាំងនោះបានកំណត់គ្នាទៅជិះស្គី នៅជិតរមណីយដ្ឋាន ជិះស្គី Tomamu ភាគកណ្តាលដែនកោះ Hokkaido ។ នេះបើតាមមន្ត្រីក្នុងតំបន់បានបញ្ជាក់ប្រាប់ប្រភពព័ត៌មានផ្សាយថ្ងៃទី៣១ ខែមករា ឆ្នាំ២០២០ ។
អ្នកជិះស្គីម្នាក់មានភព្វសំណាងរួចផុតពីគ្រោះថ្នាក់នេះ បានផ្តល់ព័ត៌មានដល់ប៉ូលិសក្នុងតំបន់ស្វែងរកជំនួយបន្ទាន់ ។ ប៉ូលិសបញ្ជាក់ថា ក្នុងចំណោមជនរងគ្រោះមានបុរសជនជាតិបារាំងម្នាក់ អាយុប្រហែល៤០ឆ្នាំ សង្ស័យថា បានបាត់បង់ជីវិតដោយសារហេតុការណ៍នេះ ។ ចំណែកជនរងគ្រោះ៦នាក់ផ្សេងទៀតបានរងរបួស ត្រូវបញ្ជូនទៅកាន់មន្ទីរពេទ្យ ។ ព័ត៌មានលម្អិតអំពីអត្តសញ្ញាណរបស់ពួកគេ មិនត្រូវបានបញ្ជាក់ប្រាប់ដល់អ្នកកាសែតបានដឹងនោះទេ ។
មន្ត្រីក្នុងតំបន់បានឲ្យដឹងថា ក្រុមជួយសង្គ្រោះបានឆ្ពោះទៅកាន់កន្លែងកើតហេតុធ្វើប្រតិបត្តិការជួយសង្គ្រោះ ។ ប៉ុន្តែប្រតិបត្តិការហាក់មានការលំបាកខ្លះ ដោយអាស្រ័យប្រឈមនឹងការបាក់ផ្ទាំងព្រឹលទឹកកកដទៃផ្សេងទៀត ៕
