សារព័ត៌មាន នគរវត្ត តែងតែនាំមុខគេជានិច្ច
ខណៈដែលចិនកំពុងគ្រប់គ្រង ស្ថានភាពនៃការឆ្លងរាលដាលវីរុសកូវីដ-១៩ បានល្អបំផុត ដោយមានអ្នកស្លាប់ និងឆ្លងធ្លាក់ចុះ ទាប់បំផុត ក្នុងមួយថ្ងៃៗ។ ចំណែកអ្នកចេញពីមន្ទីរពេទ្យក៏កើនឡើងជិត៥ម៉ឺននាក់ហើយដែរ។
ចំណែកអាមេរិកវិញ ដែលរើសអើងជនជាតិចិន ដោយបុរសជនជាតិអាមេរិកម្នាក់បានដេញវាយជនជាតិចិនពាក់ម៉ាស់ថាជា វីរុស ឥឡូវយ៉ាងម៉េចហើយម្តេចមិនដេញវាយពលរដ្ឋអាមេរិក ពាក់ម៉ាស់ដែរទៅ។ ពេលនេះអាមេរិកមានអ្នកស្លាប់ ៩នាក់និងឆ្លងជាង១០០នាក់ដោយកូវីដ-១៩។
កាលពីថ្ងៃទី៣ ខែមីនា អាមេរិកមានករណីស្លាប់ ដោយសារវីរុស Covid-19 ចំនួន៣នាក់បន្ថែមទៀត ធ្វើឲ្យចំនួនអ្នកស្លាប់ កើនឡើងដល់ទៅ៩នាក់។ មន្ត្រីទីក្រុងវ៉ាស៊ីនតោន បានប្រកាសអាន្ន ក្នុងការទប់ស្កាត់ឆ្លងរាលដាល នៃវីរុសផ្លូវដង្ហើមដ៏កាចសហាវនេះ។
ចំនួនអ្នកស្លាប់ទាំង៩នាក់ គឺស្ថិតនៅរដ្ឋវ៉ាស៊ីនតោន ភាគខាងលិចទឹកដីអាមេរិក ហើយអ្នកស្លាប់ ភាគច្រើន ស្ថិតក្នុងមណ្ឌលចាសជរា នៅតំបន់ Seattle ។
វេជ្ជបណ្ឌិតNancy Messonnier តំណាងមជ្ឈមណ្ឌលគ្រប់គ្រងបង្ការជំងឺឆ្លង អាមេរិក CDC បានលើកឡើងថា អ្វីដែលបានកើតឡើង នៅក្នុងទឹកដីអាមេរិក នាពេលនេះគ្រាន់តែជាការចាប់ផ្តើមប៉ុណ្ណោះ ។
លោកស្រី Nancy Messonnier បានបញ្ជាក់ថា ប្រទេសចិន ជាកន្លែងផ្ទុះឡើងវីរុសផ្លូវដង្ហើមនេះ កាលពីពីរខែមុន។ នេះបង្ហាញឲ្យឃើញថា មនុស្សចាស់ជរាមានភាពខ្សោយ ងាយនឹងឆ្លងវីរុសផ្លូវដង្ហើម ដោយមានអត្រាខ្ពស់ជាងក្មេងៗ ដែលមានសុខភាពល្អ រហូតដល់ទៅ២ដង។
បច្ចុប្បន្ន នៅក្នុងទឹកដីអាមេរិក មានករណីឆ្លងវីរុសផ្លូវដង្ហើម កើនឡើងដល់១០៨នាក់ ក្នុងនោះមាន៦០នាក់ឆ្លង នៅក្នុងទឹកដីអាមេរិក និងពលរដ្ឋអាមេរិកចំនួន៤៨នាក់ឆ្លងមកពីក្រៅប្រទេស។ នៅថ្ងៃទី៤ ខែមីនា សភាអាមេរិកនឹងបោះឆ្នោតអនុម័តមូលនិធិបន្ទាន់ សម្រាប់ទប់ស្កាត់ការឆ្លងរាលដាល នៃវីរុសផ្លូវដង្ហើមថ្មី ដែលមានទឹកប្រាក់ រហូតដល់ទៅ ៨,៨ពាន់លានដុល្លារ។
ចំនួនអ្នកស្លាប់និងឆ្លងCovid-19នៅអឺរ៉ុប កើនឡើងខ្ពស់
បណ្តាប្រទេសនៅក្នុងតំបន់អឺរ៉ុប មានករណីឆ្លងវីរុស Covid-19 កើនឡើងខ្ពស់ ក្នុងថ្ងៃទី៣ខែមីនា។ នៅក្នុងប្រទេសអ៊ីតាលី មានករណីស្លាប់ដោយវីរុសផ្លូវដង្ហើម ២៧នាក់និងជិត៥០០នាក់ឆ្លងថ្មី ចំនួនអ្នកស្លាប់នៅអ៊ីតាលី កើនឡើង ដល់៧៩នាក់ និងអ្នកឆ្លង ២៥០២នាក់។
ដើម្បីទប់ស្កាត់ការឆ្លងរាលដាលកាន់តែខ្លាំង រដ្ឋាភិបាលអ៊ីតាលីបានសម្រេចចេញច្បាប់ថ្មី ហាមពលរដ្ឋចាប់ដៃ និងឈរឆ្ងាយពីគ្នា យ៉ាងតិច២ម៉ែត្រ ។ ជាមួយគ្នានោះ ការប្រកួតកីឡាទាំងអស់នៅទូទាំងប្រទេស អ៊ីតាលីត្រូវលុបចោល ។
ដោយឡែកនៅក្នុងប្រទេសបារាំងវិញ ក្នុងថ្ងៃទី៣ខែមីនា មានអ្នកស្លាប់ម្នាក់ទៀតហើយ និងអ្នកឆ្លងថ្មីមាន២១នាក់ ធ្វើឲ្យចំនួនអ្នកស្លាប់ កើនឡើង៤នាក់នៅបារាំង និងឆ្លងកើនឡើង២១២នាក់។ ប្រធានាធិបតីបារាំង បានលុប ដំណើរទស្សនកិច្ចទៅក្រៅប្រទេសដើម្បីបញ្ជារយុទ្ធនាការប្រឆាំងវីរុស Covid-19 ។ ប្រធានាធិបតីបារាំង បានបញ្ជាក់ថា សង្គ្រាមប្រឆាំងវីរុស Covid-19 នឹងត្រូវអូសបន្លាយរយៈពេលយូ។
ជាមួយគ្នានេះ រដ្ឋមន្ត្រីក្រសួង សេដ្ឋកិច្ចបារាំង លោក Bruno Le Maire បានប្រកាសថានឹងផាកពិន័យយ៉ាងធ្ងន់បំផុតដល់អ្នកដែលលក់ម៉ាស់និងទឹកលាដៃថ្លៃជាងតម្លៃបានកំណត់ឲ្យ។ ដោយឡែកក្រសួងការពារជាតិ នឹងកោះប្រជុំមន្ត្រីការពារជាតិដើម្បីចាត់វិធានការទប់ស្កាត់ ការឆ្លងរាលដាលកាន់តែខ្លាំង។ បច្ចុប្បន្ន ប្រទេសក្នុងតំបន់អឺរ៉ុបមានអ៊ីតាលីជាដើម ។
នៅក្នុងប្រទេសអល្លឺម៉ង់ វិញមានករណីឆ្លងវីរុសផ្លូវដង្ហើមមានដល់ទៅ១៨០នាក់ ចំណែកអេស្បាញវិញក៏មាន១៦០នាក់ ផងដែរ។ ដោយឡែកនៅអង់គ្លេសមានអ្នកឆ្លងសរុប៥១នាក់៕ ម៉ែវ សាធី
