សារព័ត៌មាន នគរវត្ត តែងតែនាំមុខគេជានិច្ច
គូឡាឡាំពួរ៖ បើយោងតាមការចេញផ្សាយដោយសារព័ត៌មាន CNA នៅរសៀលថ្ងៃពុធ ទី០៤ ខែមីនា ឆ្នាំ២០២០នេះថា លោក ម៉ូហាម៉េដ អារីហ្វ ម៉ាដយូសូហ្វ (Mohamad Ariff Md Yusof) ប្រធានសភាម៉ាឡេស៊ី បានបញ្ជាក់ថា សម័យប្រជុំពេញអង្គរបស់សភា នឹងត្រូវលើកពេលរហូតដល់ថ្ងៃទី១៨ ខែឧសភា ខាងមុខនេះ បន្ទាប់ពីមានការផ្លាស់ប្ដូរមួយ នៅក្នុងរដ្ឋាភិបាលសហព័ន្ធកាលពីសប្ដាហ៍មុន ។
លោកប្រធានសភាម៉ាឡេស៊ី បានបញ្ជាក់ថា លោកទទួលបានលិខិតមួយច្បាប់ ចុះហត្ថលេខាដោយនាយករដ្ឋមន្ត្រីថ្មី លោក មូហ៍យីដឌីន យ៉ាសស៊ីន (Muhyiddin Yassin) ជុំវិញកាលបរិច្ឆេទថ្មី នៃការរៀបចំកិច្ចប្រជុំសភា ។ បើតាមលិខិតនេះដដែល រដ្ឋាភិបាលរបស់លោក Muhyiddin បានសម្រេចចិត្តថា កិច្ចប្រជុំលើកដំបូងនៃសម័យប្រជុំលើកទី ៣ នៃសភានីតិកាលទី ១៤ ដែលដំបូងឡើយគ្រោងនឹងប្រព្រឹត្តទៅនៅថ្ងៃទី០៩ ខែមីនា ឆ្នាំ២០២០ ត្រូវបានលើកពេលរហូតដល់ថ្ងៃទី១៨ ខែឧសភា ឆ្នាំ២០២០។
លោក Mohamad Ariff Md Yusof បន្ថែមទៀតថា សភាម៉ាឡេស៊ីនឹងមានរយៈពេលប្រជុំ ១៥ថ្ងៃ គឺចន្លោះពី១៨ ខែឧសភា និងថ្ងៃទី២៣ ខែមិថុនា ខណៈកិច្ចប្រជុំលើកទី ២ នឹងត្រូវធ្វើឡើងពីថ្ងៃទី២៧ ខែកក្កដា ដល់ថ្ងៃទី២៧ ខែសីហា ហើយកិច្ចប្រជុំលើកទី ៣ នឹងត្រូវប្រព្រឹត្តទៅនៅថ្ងៃទី២៨ ខែកញ្ញា ដល់ថ្ងៃទី២៦ ខែវិច្ឆិកា ក្នុងឆ្នាំ២០២០។
គួរបញ្ជាក់ថា ការប្រកាសពីការពន្យារពេលខាងលើ ធ្វើឡើងបន្ទាប់ពីលោក Muhyiddin Yassin ត្រូវបានតែងតាំងជានាយករដ្ឋមន្ត្រីម៉ាឡេស៊ីទី ៨ ជំនួសលោក មហាធៀ មហំាម៉ាត់ ដែលបានសម្រេចចិត្តលាលែងចេញពីតំណែងកាលពីចន្ទ សប្ដាហ៍មុន និងក្រោយពីគណបក្សចំរុះ ផាកាតាន់ ហារ៉ាផាន់ (Pakatan Harapan) បានអំពាវនាវឱ្យសភាបើកកិច្ចប្រជុំសភានៅថ្ងៃទី០៩ ខែមីនានេះ ដើម្បីបញ្ជាក់ឱ្យច្បាស់ថា តើសមាជិកសភាភាគច្រើនពិតជាគំាទ្រឱ្យលោក Muhyiddin អង្គុយលើកៅអីជានាយករដ្ឋមន្ត្រីដែរ ឬក៏យ៉ាងណា៕ ម៉ែវ សាធី
