សារព័ត៌មាន នគរវត្ត តែងតែនាំមុខគេជានិច្ច
បេក្ខភាពប្រធានាធិបតីអាមេរិក ដែលជាអតីតអនុប្រធានាធិបតីអាមេរិក លោក Joe Biden ទទួលបានការគាំទ្រខ្ពស់ពីពលរដ្ឋ ។ ជាមួយគ្នានោះបេក្ខភាពជាច្រើនរូប បានសម្រេចបោះបង់ចោលការប្រកួតប្រជែងក្នុងនោះមានមហាសេដ្ឋី Mike Bloomberg ។ក្រោយការចំណាយប្រាក់រហូតដល់ទៅជាង៥០០លានដុល្លារ ប៉ុន្តែមិនអាចទទួលបានការគាំទ្រគ្រប់គ្រាន់ ក្លាយជាបេក្ខភាពតំណាងឲ្យគណបក្សប្រជាធិបតេយ្យ ប្រជែងតំណែងប្រធានាធិបតីអាមេរិក ក្នុងការបោះឆ្នោត នាពេលខាងមុខនោះឡើយ។ នៅពេលនេះ មហាសេដ្ឋី Mike Bloomberg បានសម្រេចដកខ្លួន ចេញពីបេក្ខភាពប្រធានាធិបតីហើយ ដោយសារលោកមិនទទួលបានលទ្ធផលដូចការចង់បាន។
នៅថ្ងៃទី៥ ខែមីនា លោក Mike Bloomberg បានសម្រេចដកខ្លួនចេញជាផ្លូវការ ប៉ុន្តែលោកបានប្រកាសគាំទ្រដល់អតីតអនុប្រធានាធិបតីអាមេរិក លោក Joe Biden ឲ្យឈរឈ្មោះជាបេក្ខភាពប្រជែងតំណែងប្រធានាធិបតីអាមេរិកបន្ដទៀត។
មហាសេដ្ឋី Mike Bloomberg បានលើកឡើងថា កាលពី៣ខែមុន ខ្ញុំបានសម្រេចចិត្តចូលរួម ក្នុងការប្រកួតប្រជែងតំណែងប្រធានាធិបតី។ នៅថ្ងៃនេះ ខ្ញុំសូមដកខ្លួនចេញ ទុកឲ្យអ្នកមានសមត្ថភាពយកប្រជែងជាមួយលោកត្រាំ»។ ជាមួយគ្នាដែរ លោកបានគាំទ្រនយោបាយរបស់លោក Joe Biden ក្នុងវិស័យសុវត្ថិភាព កាំភ្លើង សុខាភិបាល បម្រែបម្រួលអាកាសធាតុ និង ការងារ…។
នៅពេលនេះលោក Joe Biden ទទួលបានការគាំទ្រខ្ពស់ នៅក្នុងរដ្ឋចំនួន៩ រួមមាន រដ្ឋ Alabama, Arkansas, Massachusetts, Minnesota, Carolina, Oklahoma, Tennessee, Virginia និង Texas ។ ជាមួយនឹងជ័យជម្នះខាងលើនេះ លោក Biden អាចក្លាយជាបេក្ខភាពរបស់បក្សប្រជាធិបតេយ្យ ប្រជែងតំណែងប្រធានាធិបតីជាមួយលោកត្រាំ ក្នុងការបោះឆ្នោត នាថ្ងៃទី៣ ខែវិច្ឆិកា ឆ្នាំ២០២០៕ ម៉ែវ សាធី
