សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ កម្លាំងអធិការដ្ឋាននគរបាលស្រុកឧដុង្គ បានបើកប្រតិបត្តិបង្ក្រាបមុខសញ្ញាសង្ស័យពាក់ព័ន្ធនឹងគ្រឿងញៀនមួយករណី ហើយអ្វីគួរឲ្យភ្ញាក់ផ្អើលនោះក្រៅពីឃាត់ខ្លួនជនសង្ស័យម្នាក់ ដកហូតថ្នាំញៀន៤កញ្ចប់ សមត្ថកិច្ចនៅបានដកហូតកាំភ្លើងកែច្នៃចំនួន ២ដើម ដាវ៧ ដើម និងកាំបិតផ្គាក់១០ដើម ដែលជនសង្ស័យលាក់ទុកដោយខុសច្បាប់ផងដែរ។
ប្រតិបត្តិការបង្រ្កាបគ្រឿងញៀនមួយករណីនេះធ្វើឡើង កាលពីវេលាម៉ោង៣និង១០នាទី រសៀល ថ្ងៃសុក្រ ៤កើត ខែ ផល្គុន ឆ្នាំកុរ ព.ស.២៥៦៣ ត្រូវនឹងថ្ងៃទី ២៧ ខែ មីនា ឆ្នាំ២០២០នៅចំណុចភូមិក្រាំងទំនប់ ឃុំចាន់សែន ស្រុកឧដុង្គ ។
មន្ត្រីនគរបាលស្រុកឧដុង្គ បានឲ្យដឹងថា បន្ទាប់ពីកម្លាំងទទួលបានសេចក្តីរាយការណ៍ពីប្រជាពលរដ្ឋល្អថា នៅចំណុចខាងលើ មានការជួញដូរថ្នាំញៀននោះ លោកអធិការនគរបាលស្រុកឧត្តុង្គបានបញ្ជាដល់កម្លាំងជំនាញ ចុះទៅបង្រ្កាបភ្លាមហើយឃាត់ខ្លួនជនសង្ស័យម្នាក់ឈ្មោះ ទ្រី ឡិន ភេទ ប្រុស អាយុ ៣០ឆ្នាំ នៅភូមិក្រាំងទំបន់ ឃុំចាន់សែន ស្រុកឧដុង្គ ដោយបានដកហូតម្សៅក្រាមពណ៌សថ្លាសង្ស័យជាគ្រឿងញៀនចំនួន ៤កញ្ចប់ (៣តូច និង ១មធ្យម), ទូរស័ព្ទដៃ ១គ្រឿង កាំភ្លើងកែច្នៃ ២ដើម , ដាវ ៧ដើម , កាំបិតផ្គាក់ ១០ដើម រួមនឹងឧបករណ៍ប្រើប្រាស់គ្រឿងញៀនមួយចំនួនទៀត ។
ក្រោយមកជនសង្ស័យនិងវត្ថុតាងត្រូវបានកម្លាំងនគរបាលការិយាល័យជំនាញស្រុកឧត្តុង្គ កសាងសំណុំរឿង បញ្ជូនទៅសាលាដំបូងខេត្តកំពង់ស្ពឺដើម្បីចាត់ការតាមនីតិវិធី ៕ សហការី
