សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មិនដឹងថា៖ ចាងហ្វាង គេហទំព័រ ព័ត៌មាន កសិករ គាត់ជ្រើសរើសបានបុគ្គលិក សុទ្ធតែមានគោរមងារ ឯកឧត្តម និង លោកជំទាវ យ៉ាងណានោះទេ ..? តែពេញមួយថ្ងៃទី១៩ ខែមេសា ឆ្នាំ២០២០ នេះ មានមជ្ឈដ្ឋានថ្នាក់ដឹកនាំ មន្ត្រីរាជការ ពិសេសបណ្តាញទំនាក់ទំនងសង្គម មានចំងល់មែនទែន ឃើញ លោក មាស បូពៅ ចេញកាត និងលិខិតបំពេញបេសកកម្ម អោយបុគ្គលិក សុទ្ធតែឯកឧត្តម លោកជំទាវ យ៉ាងព្រោងព្រាត..! ។
ចំណុចនេះ កើតជាចំងល់ដ៏ច្រើនថា៖ តើលោកចាងហ្វាង មាស បូពៅ ដឹងទេ ឋានៈត្រឹមណាទៅ ទើបអាច ឯកឧត្តម និង លោកជំទាវ ជាគោរមងារសម្រាប់មន្ត្រីដែលមានឋានន្តរស័ក្តិខ្ពស់ក្នុងកម្ពុជាបច្ចុប្បន្ន ។
សូមបញ្ជាក់ថា៖ គោរមងារឯកឧត្តម និង លោកជំទាវ ត្រូវបានតែងតាំងដោយព្រះរាជក្រឹត្យតាមរយៈសំណើរបស់នាយករដ្ឋមន្ត្រីឬតាមព្រះរាជតម្រិះរបស់ព្រះអង្គ ។
ជនដែលអាចមានគោរមងារជា ឯកឧត្តម និង លោកជំទាវ បានលុះត្រាតែមានតំណែងឬឋានៈស្មើជា ៖ ប្រធាន អនុប្រធាន ព្រឹទ្ធសភានិងរដ្ឋសភា , នាយករដ្ឋមន្ត្រី , ឧបនាយករដ្ឋមន្ត្រី , ទេសរដ្ឋមន្ត្រី , រដ្ឋមន្ត្រី , រដ្ឋលេខាធិការ , អនុរដ្ឋលេខាធិការ , អគ្គនាយក អគ្គាធិការ អគ្គលេខាធិការ , សមាជិករដ្ឋសភា និង ព្រឹទ្ធសភា , ឯកអគ្គរាជទូត , ក្រុមប្រឹក្សារាជធានី ខេត្ត , អភិបាលរាជធានី ខេត្ត ។
អស់លោកមន្ត្រីរាជការអ្នកមុខអ្នកការដែលមានតំណែងឬឋានៈស្មើនឹងតំណែងខាងលើទើបមានសិទ្ធិប្រើនូវគោរមងារឯកឧត្តម លោកជំទាវ ដែលតែងតាំងដោយព្រះរាជក្រឹត្យ ។ តែចំពោះអស់លោកដែលមានឋានន្តរស័ក្តិចាប់ពី ឧត្តមសេនីយ៍ត្រី ឡើងទៅ នៅក្នុង នគរបាលជាតិ កងយោធពលខេមរភូមិន្ទ កងរាជអាវុធហត្ថ មិនមែនសុទ្ធតែមានងារជាឯកឧត្តមលោកជំទាវទេ តែបើលោកបំរើការងារជាអគ្គនាយកឡើងទៅនៅក្នុងក្រសួងនានានោះទើបមានគោរមងារជា ឯកឧត្តម លោកជំទាវ ម្យ៉ាងទៀតលុះត្រាណាតែលោកជាទីប្រឹក្សាជំនួយការ លេខាធិការ ឬជាមន្ត្រីដែលមានឋានៈស្មើក្នុងមុខតំណែងខាងលើទើបមានគោរមងារជា ឯកឧត្តម លោកជំទាវ ។
ចំណែកឯនៅតាមរាជធានី ខេត្ត មានតែអភិបាលខេត្តតែប៉ុណ្ណោះដែលមានងារជា ឯកឧត្តម លោកជំទាវ ចំណែកឯអភិបាលរងឯទៀតមានងារត្រឹមលោកលោកស្រីតែប៉ុណ្ណោះតែបើអភិបាលរងរាជធានីខេត្តនោះជាទីប្រឹក្សា ជំនួយការ លេខាធិការ ឫជាមន្ត្រីដែលមានឋានៈស្មើក្នុងមុខតំណែងខាងលើទើបមានងារជា ឯកឧត្តម លោកជំទាវ ។ បើ ស្វាមីឬភរិយា ដែលមានងារជាឯកឧត្តម លោកជំទាវ ហើយនោះ ភរិយាឬស្វាមី របស់ជននោះ ក៏មានគោរមងារជាឯកឧត្តម លោកជំទាវ ដោយស្វ័យប្រវត្តិឬយ៉ាងណា.!
ក្នុងករណី បុគ្គលិក គេហទំព័រ ព័ត៌មាន កសិករ សុទ្ធតែគោរមងារ ឯកឧត្តម និង លោកជំទាវ នេះគ្រាន់តែដឹងថា មេអង្គភាពជាប្រធានគណៈបក្សនយោបាយមួយ ទើបគាត់ ដាក់បុគ្គលិក គោរមងារធំៗតែម្តង៕ដោយ៖សិ លា
