ប្រធានក្រុមសមាជិកព្រឹទ្ធសភាប្រចាំភូមិភាគទី៦ និងជាប្រធានគណៈកម្មការទី៨ ព្រឹទ្ធសភា ចុះជួបសំណេះសំណាល និងសួរសុខទុក្ខជាមួយក្រុមប្រឹក្សាឃុំ បុគ្គលិកមណ្ឌលសុខភាព

ខេត្តព្រៃវែង៖ នាព្រឹកថ្ងៃទី២៤ ខែមេសា ឆ្នាំ២០២០ លោកស្រី មាន សំអាន ប្រធានក្រុមសមាជិកព្រឹទ្ធសភាប្រចាំភូមិភាគទី៦ និងជាប្រធានគណៈកម្មការទី៨ ព្រឹទ្ធសភា រួមនឹងលោក ទឹម ផន សមាជិកក្រុម អមដំណើរដោយលោក នួន ថូ ប្រធានក្រុមប្រឹក្សាស្រុកសុីធរកណ្តាល និងមន្ត្រីនៃអគ្គលេខាធិការដ្ឋានព្រឹទ្ធសភា បានអញ្ជើញចុះជួបសំណេះសំណាល និងសួរសុខទុក្ខជាមួយក្រុមប្រឹក្សាឃុំ បុគ្គលិកមណ្ឌលសុខភាព នាយ-រងប៉ុស្តិ៍នគរបាលរដ្ឋបាលឃុំ នៅឃុំជ្រៃឃ្មុំ និងឃុំឬស្សីសាញ់ ដើម្បីផ្សព្វផ្សាយណែនាំវិធានការបង្ការ ការពារ និងទប់ស្កាត់ការរីករាលដាលជំងឺកូវីដ-១៩ (COVID-19) នៅស្រុកសុីធរកណ្តាល ខេត្តព្រៃវែង។

លោកស្រី បានលើកឡើងពីស្ថានភាពគ្រោះថ្នាក់នៃជំងឺកូវីដ-១៩ ដែលមកដល់បច្ចុប្បន្នបានរីកដាលស្ទើរគ្រប់ប្រទេសលើសកលលោក ហើយទោះបីប្រទេសកម្ពុជាមិនទាន់មានសភាពធ្ងន់ធ្ងរនៅឡើយ ដែលក្នុងសប្តាហ៍កន្លងមកនេះមិនមានរកឃើញអ្នកឆ្លងវីរុសកូវីដ-១៩ និងមានករណីព្យាបាលជាសះស្បើយជាបន្តបន្ទាប់ ( មិនមានស្លាប់ ) ក៏ពិតមែន ប៉ុន្តែមិនទាន់មានសញ្ញាណាមួយស្រាកស្រាន្តនៅឡើយដែរ។ ហេតុនេះ យើងត្រូវបង្កើន និងយកចិត្តទុកដាក់ប្រកបដោយការទទួលខុសត្រូវនិងត្រូវមានការប្រុងប្រយ័ត្នខ្ពស់ ហើយខិតខំអនុវត្តតាមបទបញ្ជារបស់ប្រមុខរាជរដ្ឋាភិបាលនៃព្រះរាជាណាចក្រកម្ពុជា និងការណែនាំរបស់ក្រសួងសុខាភិបាល ដូចជា ការអនុវត្តឲ្យបានខ្ជាប់ខ្ជួននូវអនាម័យដៃស្អាត ដោយលាងសម្អាតជាមួយទឹកស្អាតនឹងសាប៊ូ ឬអាកុល ឬទឹកជែលលាងដៃឲ្យបានញឹកញ៉ាប់ រក្សាគំលាតឲ្យបានសមស្រប ពាក់ម៉ាស់ ជាពិសេសជៀសការជួបជុំគ្នាច្រើនកុះករ និងចូលរួមកន្លែងដែលមានការប្រមូលផ្តុំគ្នាមានមនុស្សច្រើន។

ក្នុងឱកាសនោះដែរ លោកស្រី បាននាំយកអំណោយសម្ភារៈមួយចំនួនផ្តល់ជូនក្រុមការងារឃុំសម្រាប់ប្រើប្រាស់បំពេញការងារដែលក្នុងនោះរួមមាន ៖ មី ៤កេស, ក្រម៉ា ២០, សាប៊ូដុំលាងដៃ ៧២ដុំ, ម៉ាស់ ១០០ម៉ាស់, អាល់កុល (ចំណុះ ១០០ml ២០ដប និងចំណុះ ១០លីត្រ ១ប៊ីដុង និងថវិកាចំនួន ៣០០,០០០៛ ( បីរយពាន់រៀល ) ផងដែរ៕ដោយ៖ សិលា