សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្ចាស់រថយន្ដ Ford ពាក់ស្លាកលេខ ខម បើកបុកមនុស្សស្លាប់កណ្តាលផ្លូវ ហើយមេឃកំពុងភ្លៀង ព្យាយាមអូសម៉ូតូជនរងគ្រោះចេញពីឡាន រួចបើកគេច ពីកន្លែងកើតហេតុនោះ ត្រូវគេស្គាល់អត្តសញ្ញាណហើយ តាមរយៈអ្នកលេងហ្វេសប៊ុកស្គាល់ បានចែករំលែករូប ដើម្បីអោយសមត្ថកិច្ចងាយស្រួលតាមប្រមាញ់។
សូមបញ្ជាក់ថា៖ ជនរងគ្រោះ ជាកម្មកររោងចក្រដែលបានស្លាប់ក្នុងហេតុការណ៍គ្រោះថ្នាក់ចរាចរណ៍ កាលពីយប់ថ្ងៃទី ២៥ ខែ មេសា ឆ្នាំ២០២០នៅមហាវិថី សម្តេចចៅហ្វាវាំង វររៀងជ័យ អធិបតីស្រឹង្គារ គង់ សំអុល អតីតផ្លូវ២០០៤ ខណ្ឌ ពោធិ៍សែនជ័យ។ ពេលកើតហេតុភ្លាមមានប្រជាពលរដ្ឋបានទៅលើកជនរងគ្រោះចេញពីផ្លូវមេឃកំពុងភ្លៀង ដើម្បីជួយសង្គ្រោះ តែជាអកុសល ជនរងគ្រោះបានស្លាប់បាត់ទៅហើយ។ ដោយឡែកជនបង្កដើរមើលឡាន មើលជនរងគ្រោះ ទាញម៉ូតូចេញពីក្រោមឡានផ្នែកខាងមុខ រួចបើកចេញទៅបាត់។ បន្សល់ទុកនូវវីដេអូ រូបភាព ដែលប្រជាពលរដ្ឋថតទាំងភ្លៀង។
ប្រភពខ្លះបានលួចបង្ហើបថា៖ ជនបង្កបើកឡានបុកមនុស្សស្លាប់ មានឈ្មោះ ឈុន សារ៉េត តែគេពុំបានបញ្ជាក់ពីតួនាទី និងកន្លែងធ្វើការទេ គ្រាន់អោយជារូប ទុកអោយសមត្ថកិច្ចស្វែងរកមុខចាប់ខ្លួនមកផ្តន្ទាទោស។
យកល្អ គួរជនប្រព្រឹត្តនេះ ចេញមុខមកទទួលខុសត្រូវចំពោះមុខច្បាប់ ក្នុងការសងសំណងរដ្ឋប្បវេណីដល់គ្រួសារសព ដែលស្ថិតក្នុងជីវភាពក្រលំបាក មានកូនតូច២ ក្នុងបន្ទុក៕ដោយ៖សិលា
