ជនសង្ស័យម្នាក់​ លួចកាបូបស្ពាយស្ត្រីរងគ្រោះកំពុងតែដេកបានសម្រេច​ តែគេចមិនផុតខ្នោះសមត្ថកិច្ចខណ្ឌច្បារអំពៅ

       ភ្នំពេញ​ ៖​ យោងតាមរបាយការណ៍របស់លោក​វរសេនីយ៍ឯក​ ម៉ៅ​ សឿត​ អធិការនគរបាលខណ្ឌច្បារអំពៅ​ បានឲ្យដឹងនៅព្រឹកថ្ងៃទី​៣​ ខែមេសា​ ឆ្នាំ​២០២០នេះ​ មានករណីលួចកាបូបស្ពាយ នៅផ្ទះគ្មានលេខ ភូមិបឹងឈូក សង្កាត់និរោធ ខណ្ឌ ច្បារអំពៅ ថ្ងៃទី០២​ខែមេសា​ ឆ្នាំ២០២០ ម៉ោង១៣ និង០០នាទី​ ត្រូវសមត្ថកិច្ចស្រាវជ្រាវចាប់ខ្លួនជនស្ស័យបានម្នាក់​ ។

​     ក្នុងរបាយការណ៍បានបញ្ចាក់ថា​ ជនរងគ្រោះឈ្មោះវុន វណ្ណថា ភេទ ស្រី អាយុ៥២ឆ្នាំ ជនជាតិខ្មែរ មុខរបរ នៅផ្ទះ ស្នាក់នៅភូមិខ្សុំ ឃុំកំពង់អំពិល ស្រុកពារាំង ខេត្តព្រៃវែង។​ ចំណែកជនសង្ស័យឈ្មោះ សុខ ភារុណ ភេទប្រុស អាយុ៤០ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅភូមិបឹងឈូក សង្កាត់ និរោធ ខណ្ឌ ច្បារអំពៅ។

      លោកវរសេនីយ៍ឯក​ ម៉ៅ​ សឿត​ អធិការនគរបាលខណ្ឌច្បារអំពៅ​ បានឲ្យដឹងថា ៖ មុនពេលកើតហេតុជនរងគ្រោះដេកនៅលើអង្រឹងក្រោមផ្ទះ (ចំណុចកើតហេតុ) រួចទុកកាបូបស្ពាយពណ៌សូកូឡា(មានលុយ២០០ដុល្លា) នៅលើពោះ ហើយក៏ដេកលក់ ស្រាប់តែជនសង្ស័យដើរមកលួចកាបូបជនរងគ្រោះ បំរុងគេចខ្លួន ក៏ត្រូវបានជនរងគ្រោះភ្ញាក់ដឹងខ្លួនឃើញស្រែកចោរៗ ជនសង្ស័យក៏យកកាបូប រត់គេចខ្លួន ជនរងគ្រោះក៏មកប្តឹងសមត្ថកិច្ច។ រហូតដល់ម៉ោង១៦និង៣០នាទីល្ងាច ថ្ងៃដដែល សមត្ថកិច្ចយើងឃាត់ខ្លួនបានជនសង្ស័យនៅភូមិបឹងឈូក សង្កាត់និរោធ ដកហូតកាបូប និងលុយខាងលើ បញ្ជូនមកអធិការដ្ឋាន នគរបាលខណ្ឌច្បារអំពៅ ធ្វើការសាកសួរ។

​      គួរបញ្ចាក់ថា​ កន្លងមកជនសង្ស័យធ្លាប់ជាប់ពន្ធនាគារព្រៃស០១ឆ្នាំ ក្នុងឆ្នាំ២០១៨ ពីបទ លួច ព្រមទាំងប្រើប្រាស់គ្រឿងញៀន​ផងដែរ​ ៕​ ដោយ៖​ ភារ៉ា​ ដង្កោ