សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ត្រូវប្រជាពលរដ្ឋរងគ្រោះចាប់យកមកប្រគល់ឱ្យសមត្ថកិច្ចក្រោយពីរូបគេបានធានាថាយកគ្រឿងចក្រ(អេឡេវ៉ាទ័រ)ទៅជួសជុលក្នុងតម្លៃជិតពីរមុឺនដុល្លារបែរជាយកទៅបាត់រហូត។
ការឃាត់ខ្លួនជនសង្ស័យខាងលើនេះធ្វើឡើងកាលពីវេលាម៉ោង១៧ និង១០នាទីយប់ថ្ងៃទី០៥ខែឧសភាឆ្នាំ២០២០ នៅចំណុចតាមបណ្តោយផ្លូវលេខ៥៩៨ក្នុងសង្កាត់ទួលសង្កែ២ ខណ្ឌឫស្សីកែវហើយយកមកប្រគល់ឱ្យនគរបាលប៉ុស្តិ៍ឃ្មួញវិញ។
ជនសង្ស័យមានឈ្មោះ វ៉ាន់ ជឿង ភេទប្រុស អាយុ៤៥ឆ្នាំ ជនជាតិខ្មែរ មុខរបរជួសជុលគ្រឿងចក្រ ស្នាក់នៅភូមិដើមគ សង្កាត់ជ្រោយចង្វា ខណ្ឌជ្រោយចង្វា (គ្មានសារធាតុញៀន)។ ចំណែកជនរងគ្រោះឈ្មោះ តាំង យូហួត ភេទប្រុស អាយុ៤០ឆ្នាំ ជនជាតិខ្មែរ មុខរបរទទួលលើកឡាន ស្នាក់នៅផ្ទះលេខ១០៨ ផ្លូវបេតុង ភូមិសំបួរ សង្កាត់ដង្កោ ខណ្ឌដង្កោ ។
លោក ញាណ នន នាយនគរបាលប៉ុស្តិ៍ឃ្មួញបានឱ្យដឹងថា៖កាលពីថ្ងៃទី១៤-០២-២០២០ វេលាម៉ោង១៤និង ០០នាទី ជនរងគ្រោះបានហៅជនសង្ស័យឲ្យមកមើលគ្រឿងចក្រ(អេឡេវ៉ាទ័រ)ដែលខូចដើម្បីឲ្យជនសង្ស័យយកទៅជួសជុល។ក្រោយមកជនសង្ស័យបានសុំលុយចំនួន២.៥០០ដុល្លារដើម្បីទៅទិញគ្រឿងបន្លាស់ហើយក៏ឱ្យម្ចាស់គ្រឿងចក្រនោះដឹកយកទៅឃ្លាំងជួសជុលគ្រឿងយន្តរបស់គេនៅផ្លូវលេខ១០១៩ ស្ថិតក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ។លុះបានមួយរយៈមកម្ចាស់គ្រឿងចក្រក៏ទៅមើលស្រាប់តែបាត់ទាំងជនសង្ស័យនិងគ្រឿងចក្រទាំងអស់ ប៉ុន្តែគាត់មិនបានទៅប្តឹងឱ្យសមត្ថកិច្ចជួយធ្វើអន្តរាគមន៍អីដែរ រហូតដល់ថ្ងៃទី៥ខែឧសភាឆ្នាំ២០២០ជនរងគ្រោះបានធ្វើដំណើរតាមបណ្តោយផ្លូវលេខ៥៩៨ក្នុងខណ្ឌឫស្សីកែវក៏ឃើញជនសង្ស័យកំពុងជិះម៉ូតូ០១គ្រឿង ម៉ាកសង់ការ៉េ ពណ៌ក្រហមពាក់ស្លាកលេខតាកែវ1D-6649ក៏ឃាត់យកមកប្រគល់ឱ្យសមត្ថកិច្ចនគរបាលប៉ុស្តិ៍ឃ្មួញនិងដាក់ពាក្យបណ្តឹងតែម្តង។
សម្ភារបាត់បង់ មានលុយដុល្លារចំនួន២,៥០០ដុល្លារ , គ្រឿងចក្រអេឡេវ៉ាទ័រ ០១គ្រឿង តម្លៃ១៧,០០០ដុល្លារ ។សម្ភារបន្សល់ទុក ម៉ូតូ០១គ្រឿង ម៉ាកសង់ការ៉េ ពណ៌ក្រហមពាក់ស្លាកលេខតាកែវ1D-6649 របស់ជនសង្ស័យ ។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធី ៕ដោយ៖ ចន្ទ លីហ្សា
