ហាងទំនិញ និងសាលារៀន នៅអាល្លឺម៉ង់ គ្រោងនឹងបើកឡើងវិញ ក្នុងខែឧសភានេះ

អាល្លឺម៉ង់៖ បន្ទាប់ពីប្រទេសអាលឺ្លម៉ង់ នាថ្មីៗនេះ បានវិលត្រឡប់ទៅកាន់ស្ថានភាពប្រក្រតីវិញនោះ អាជ្ញាធរគ្រោងនឹងបើកហាង និងសាលារៀនឡើងវិញ នៅក្នុងខែឧសភានេះ ក្រោយបិទទ្វារអស់ជាច្រើនសប្ដាហ៍ ដើម្បីទប់ស្កាត់ការឆ្លងរាតត្បាត COVID-19 ។

ទីភ្នាក់ងារព័ត៌មាន AFP នៅថ្ងៃពុធ ទី៦ ខែឧសភា ឆ្នាំ២០២០ បានធ្វើសេចក្ដីរាយការណ៍ថា ដោយផ្អែកលើសេចក្ដីព្រាង នៃកិច្ចព្រមព្រៀងមួយរវាងលោកស្រីអធិបការបតី អាន់ជែលឡា មឺគែល និងប្រធានរដ្ឋបាល មកពីរដ្ឋសហភាព័ន្ធទាំង១៦ ដែលត្រូវបានគេរំពឹងថានឹងចុះហត្ថលេខានៅថ្ងៃពុធនេះ។ មកទល់នឹងពេលនេះ មានតែកុមារមួយចំនួនដែល ត្រូវប្រឡង ក្នុងពេលឆាប់នេះតែប៉ុណ្ណោះ ត្រូវបានអនុញ្ញាតឱ្យត្រឡប់ទៅសាលារៀនវិញខណៈថ្នាក់មតេយ្យ និងបឋម គ្រោងនឹងបើកទ្វារនៅសប្ដាហ៍ក្រោយ។

តាមសេចក្ដីព្រាងខាងលើដដែល ហាងទាំងអស់អាចបើកទ្វារឡើងវិញ តែតម្រូវឱ្យអនុវត្តវិធានការរក្សាអនាម័យខ្ពស់ និងគ្រប់គ្រងការចេញចូល បានល្អត្រឹមត្រូវតាមការកំណត់។ ចំណែកឯ ភោជនីយដ្ឋាន សាលប្រគុំតន្ត្រី ក្លឹបរាត្រីនិងកន្លែងហាត់ប្រាណ កំពុងស្ថិតនៅក្រោមការពិចារណាថា គួរតែបើក ទ្វារនៅថ្ងៃទី០៩ ខែឧសភា ដែរឬក៏យ៉ាងណា ស្របពេលព្រឹត្តិការណ៍ធំៗខ្លះ នឹងនៅតែត្រូវបានហាមឃាត់យ៉ាងហោចរហូតដល់ថ្ងៃទី៣១ ខែសីហា។

បច្ចុប្បន្ន អាល្លឺម៉ង់ មានអ្នកឆ្លង COVID-19 ១៦៧,០០៧នាក់ ក្នុងនោះស្លាប់ ៦,៩៩៣នាក់ និងជាសះស្បើយ ឡើងវិញ ១៣៧,៤០០នាក់ ។ នេះបើតាមគេហទំព័រ worldometers ៕ដោយ៖ស តារា