សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ កម្លាំងនគរបាលព្រហ្មទណ្ឌខេត្តកំពង់ធំ សហការជាមួយកម្លាំងនគរបាលក្រុងស្ទឹងសែន កម្លាំងនគរបាលប៉ុស្តិ៍ និងដោយមានការសម្របសម្រួលនីតិវិធីពីលោក ស៊ិន វិរៈ ព្រះរាជអាជ្ញាអមសាលាដំបូងខេត្តកំពង់ធំផងនោះ បានចុះបង្រ្កាបល្បែងស៊ីសង(ល្បែងខ្លាឃ្លោក)មួយកន្លែងឃាត់បានមនុស្ស៣នាក់ និងវត្ថុតាងមួយចំនួន។
ការបង្រ្កាបល្បែងស៊ីសងខាងលើនេះប្រព្រឹត្តទៅកាលពីវេលាម៉ោង៥ល្ងាចថ្ងៃពុធ ៧រោច ខែពិសាខ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១៣ ខែឧសភា ឆ្នាំ២០២០ ស្ថិតនៅចំណុចផ្ទះឈ្មោះ ឈាន ឈឿន ហៅ អូ ភេទប្រុស ស្ថិតនៅភូមិរលួស សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។
មន្រី្តនគរបាលក្រុងស្ទឹងសែនបានឲ្យដឹងថា ក្នុងការបង្រ្កាបនេះកម្លាំងជំនាញដកហូតបាន វត្ថុតាងរួមមានៈ ម៉ូតូចំនួន ៦គ្រឿង, គ្រាប់ខ្លាឃ្លោកចំនួន ៧គ្រាប់និងគ្រាប់ឡុកឡាក់កែច្នៃមិនទាន់រួចចំនួន ០៧គ្រាប់, ចានចំនួន០៣គម្របចានចំនួន១, ហាន់តោចំនួន ០២,ស្បែកជើងចំនួន ០២ គូកន្លះ,កាបូបស្ពាយចំនួន ០១,កម្រាលចំនួន ០១,ធុងប៉េត្រូចំនួន ០៣ ,អំពូលភ្លើងចំនួន ០១,ទូរស័ព្ទដៃ ចំនួន ០២គ្រឿងអាយផេត០១ ធុងទឹកកកចំនួន០១។
ជាមួយគ្នានេះដែរសមត្ថកិច្ចបានឃាត់ខ្លួនមនុស្សនៅក្នុងវង់ល្បែងចំនួន៣នាក់ ១.ឈ្មោះ ហាត មុំ ភេទស្រី អាយុ៤៥ឆ្នាំ អ្នកលេងធ្វើមេជាមួយប្តីនិងជាម្ចាស់ផ្ទះ, ២.ឈ្មោះ រឿង ស្រីល័ក្ខ ភេទស្រី អាយុ២៨ឆ្នាំ ជាអ្នកលេង, ៣.ឈ្មោះ ប៊ុន ស្រីល័ក្ខ ភេទស្រី អាយុ២៨ឆ្នាំ ជាអ្នកលេង។
ជនសង្ស័យទាំងអស់ និងវត្ថុតាង ត្រូវឃាត់ទុកនៅស្នងការដ្ឋាននគរបាលខេត្តកំពង់ធំ ដើម្បីសាកសួរយកចម្លើយ និងបំពេញសំណុំបែបបទតាមនីតិវិធី ៕ដោយ÷ប្រាថ្នា
