រថយន្តម៉ាស់ស្តាពន្លះជាមួយគោយន្តកន្ត្រៃពេញទំហឹង បណ្តាលឲ្យមនុស្សរងរបួសធ្ងន់និងស្រាល៩នាក់

ខេត្តស្ទឹងត្រែង៖ រថយន្តម៉ាក (ម៉ាស់ស្តា) ១គ្រឿងបានបើកទៅបុកគោយន្តកន្ត្រៃយ៉ាងពេញទំហឹង ខណៈបើកបរក្នុងទិសដៅបញ្ច្រាស់គ្នា បណ្តាលឲ្យមនុស្សជិះលើគោយន្តកន្ត្រៃ ដែលជាអ្នករួមដំណើរ៩នាក់ក្នុងចំណោម១៣នាក់រងរបួសធ្ងន់ស្រាល ហើយបង្កឲ្យមានការភ្ញាក់ផ្អើលដល់ប្រជាពលរដ្ឋរស់នៅទីនោះ មកចោមរោមមើល ។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១៧និង៥០នាទី ថ្ងៃទី១៤ ខែឧសភា  ឆ្នាំ២០២០  នៅផ្លូវលំក្រាលក្រួសក្រហម ត្រង់ចំណុចអូររុនស្ថិត ក្នុងភូមិកាំងចាម ឃុំកាំងចាម ស្រុកថាឡាបរិវ៉ាត់ ខេត្តស្ទឹងត្រែង ។

បើតាមសមត្ថកិច្ចបានឲ្យដឹងថា អ្នកជិះនៅលើគោយន្តកន្ត្រៃ ដែលជាអ្នករួមដំណើរនោះ ទាំងអស់មានចំនួន១៣នាក់ ចំណែកអ្នករងរបួសធ្ងន់និងស្រាលមានចំនួន០៩នាក់ក្នុងនោះអ្នករបួសធ្ងន់ចំនួន០៤នាក់ របួសស្រាលចំនួន០៥នាក់ ។  

សមត្ថកិច្ចបានបញ្ជាក់ថា អ្នកបើកបររថយន្តមានឈ្មោះព្រីង ពិសិដ្ឋ  ភេទប្រុសមានអាយុ៣៧ឆ្នាំ មុខរបរអាជីវករនៅ រាជធានីភ្នំពេញ បានបើកបររថយន្តម៉ាក(ម៉ាស់ស្តា) ពណ៌ត្រាវ ពាក់ស្លាកលេខភ្នំពេញ2AZ-1057 ក្នុងទិសដៅពីលិចទៅកើត បានបើកទៅបុកជាមួយគោយន្តកន្ត្រៃម៉ាកគូបូតា ពណ៌ក្រហម បើកបរក្នុងទិសដៅពីកើតទៅលិច។ចំណែកអ្នកបើកបរគោយន្តកន្ត្រៃមានឈ្មោះប៉ាង ព្រឹត្ត អាយុ២៩ឆ្នាំ មុខរបរកសិករ មានទីលំនៅ ស្ថិតនៅក្នុងភូមិកើតហេតុខាងលើ។

ចំណែករថយន្តម៉ាក(ម៉ាស់ស្តា) ដែលបង្កហេតុនោះ រងការខូចខាតមួយកំណាត់ខាងមុខ ចំណែកគោយន្តកន្ត្រៃ មានការខូចខាតបន្តិចបន្តួចតែប៉ុណ្ណោះ។ បច្ចុប្បន្នត្រូវបាននគរបាលប៉ុស្តិ៍កាំងចាម យកមករក្សាទុកនៅប៉ុស្តិ៍ដើម្បីដោះស្រាយតាមផ្លូវច្បាប់។

 រីឯមនុស្សដែលជិះនៅលើគោយន្តបានរងរបួសធ្ងន់និងស្រាលនោះ ក្រោយពេលកើតហេតុ ត្រូវបានដឹកជញ្ជូនយកមកសង្គ្រោះនៅមន្ទីរពេទ្យបង្អែកខេត្តស្ទឹងត្រែង ៕ដោយ៖មាស សុផាត