ចោរស្រីដៃឆើតធ្វើសកម្មភាពច្រើនដងនៅអូរបាក់រទេះ ចុងក្រោយមកជាប់ខ្នោះនៅត្រែងត្រយឹង

កំពង់ស្ពឺ៖មុខសញ្ញាចោរស្រីលួចដ៏សកម្មម្នាក់ត្រូវបាននគរបាលប៉ុស្តិ៍ត្រែងត្រយឹងធ្វើការឃាត់ខ្លួនក្រោយពេលជនសង្ស័យធ្វើសកម្មភាពលួចកាច់កម៉ូតូរបស់ប្រជាពលរដ្ឋ។ជនសង្ស័យត្រូវបានសមត្ថកិច្ចអះអាងថាគឺជាមុខសញ្ញាដែលធ្វើសកម្មភាពយ៉ាងសកម្មនៅក្នុងទឹកដីឃុំអូរបាក់រទេះស្រុកកំពង់សិលាខេត្តព្រះសីហនុ។ក្រោយពេលឃាត់ខ្លួនសមត្ថកិច្ចនគរបាលស្រុកកំពង់សិលាបានទំនាក់ទំនងស្នើសុំយកជនសង្ស័យទៅកសាងសំណុំរឿងដើម្បីចាត់ការបន្តតាមនីតិវិធី។

ជនសង្ស័យមានឈ្មោះជា ស្រីម៉ី អាយុ 20ឆ្នាំរស់នៅភូមិក្រាំងស្វាយឃុំរលាំងគ្រើលស្រុកសំរោងទងខេត្តកំពង់ស្ពឺ។

សមត្ថកិច្ចឃាត់ខ្លួននៅចំណុចផ្សារត្រែងត្រយឹងស្រុកភ្នំស្រួចខេត្តកំពង់ស្ពឺពីបទលួចម៉ូតូកាលពីរសៀលថ្ងៃទី 15 ខែឧសភាឆ្នាំ 2020។

ក្រោយពេលឃាត់ខ្លួនជនសង្ស័យបានសារភាពថារូបគេធ្វើដំណើរចេញពីផ្ទះក្នុងគោលបំណងទៅរកលួចម៉ូតូនៅចំណុចផ្សារត្រែងត្រយឹងតែពេលធ្វើសកម្មភាពក៏ត្រូវសមត្ថកិច្ចឃាត់ខ្លួនបានតែម្ដង។

ជនសង្ស័យបានសារភាពបន្តថាកន្លងមករូបខ្លួនធ្លាប់បានធ្វើសកម្មភាពលួចម៉ូតូនិងសម្ភារៈជាច្រើនលើកច្រើនសារនៅភូមិស្ទឹងច្រាលឃុំអូរបាក់រទេះស្រុកកំពង់សិលាខេត្តព្រះសីហនុដែលកន្លងមកមិនដែលមានអ្នកណាចាប់បាននោះទេ។

ប្រភពពីសមត្ថកិច្ចបានឲ្យដឹងថាដោយមានការស្នើសុំពីសមត្ថកិច្ចនគរបាលឃុំអូរបាក់រទេះដែលកន្លងមកជនសង្ស័យរូបនេះធ្វើសកម្មភាពលួចសម្ភារៈនិងម៉ូតូជាច្រើនលើកច្រើនសារសមត្ថកិច្ចនគរបាលខេត្តកំពង់ស្ពឺបន្ទាប់ពីកសាងសំណុំរឿងរួចបានប្រគល់ជនសង្ស័យទៅនាយប៉ុស្តិ៍អូរបាក់រទេះដើម្បីកសាងសំណុំរឿងតាមនីតិវិធីបន្ត។

មហាជននៅឃុំត្រែងត្រយឹងបានលាន់មាត់ថាកន្លងមកធ្លាប់តែឃើញជនសង្ស័យចោរលួចជាប្រុសតែលើកនេះបែរជាមានចោរជាស្រីទៅវិញពិតជាប្លែកខុសពីរាល់ដង៕ដោយ៖សេនាស័ក្តិ