បុរស២នាក់ជិះម៉ូតូបុកគម្របលូស្លាប់ម្នាក់និងរងរបួសធ្ងន់ម្នាក់

ខេត្តស្វាយរៀង៖ បុរស២នាក់បានស្លាប់ម្នាក់និងរបួសធ្ងន់ម្នាក់ដោយសារករណីគ្រោះថ្នាក់ចរាចរណ៍ជិះម៉ូតូបុកគម្របលូពេញទំហឹងបណ្តាលឱ្យដួលកាលពីវេលាម៉ោង១០និង៣០នាទី យប់ ថ្ងៃទី ១៦ខែឧសភា ឆ្នាំ២០២០ នៅលើផ្លូវជាតិលេខ១ ចន្លោះគីឡូម៉ែត្រ១៤៦-១៤៧ស្ថិត ក្នុងភូមិថ្នល់ជាតិ សង្កាត់ច្រកម្ទេស ក្រុងបាវិត ខេត្តស្វាយរៀង ។

បើតាមសមត្ថកិច្ចនគរបាលក្រុងបាវិតបានឱ្យដឹងថា បុរសដែលស្លាប់មានឈ្មោះស្រូប ហ៊ី  អាយុ២៧ឆ្នាំ ជនជាតិខ្មែរ មុខរបរកម្មករសំណង់ មានទីលំនៅភូមិថ្មី ឃុំពាមរាំង ស្រុកលើកដែក ខេត្តកណ្ដាលនិងអ្នករួមដំណើរមានឈ្មោះនី កូឡា អាយុ២៦ឆ្នាំ ជនជាតិខ្មែរ មុខរបរកម្មករសំណង់រស់ក្នុងភូមិឃុំជាមួយគ្នារបួសធ្ងន់។

សមត្ថកិច្ចបានបញ្ជាក់ថា មុនកើតហេតុមានបុរស២នាក់បានជិះម៉ូតូមួយគ្រឿងម៉ាកហុងដាវ៉េវពណ៌សពាក់ស្លាកលេខ កំពង់ឆ្នាំង ១D-២៧០៧នៅលើផ្លូវជាតិលេខ១ ចន្លោះគីឡូម៉ែត្រ១៤៦-១៤៧ ក្នុងទិសដៅពីកើតមកលិច លុះបើកមកដល់ ចំណុចកើតហេតុខាងលើក៏បុកនិងគម្របលូបណ្តាលឱ្យដួលបោកក្បាលស្លាប់ ឯអ្នករួមដំណើររងរបួសធ្ងន់ ត្រូវបានបញ្ជូនទៅព្យាបាលនៅមន្ទីរពេទ្យបង្អែកជីភូ ។

បច្ចុប្បន្នសាកសព សមត្ថកិច្ចធ្វើកំណត់ហេតុនិងប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕យឹម សុថាន