រថយន្តនិងម៉ូតូបុកគ្នាបណ្តាលឲ្យបុរសម្នាក់រងរបួសធ្ងន់

ភ្នំពេញ៖ រថយន្តនិងម៉ូតូបុកគ្នាបណ្តាលឲ្យបុរសម្នាក់រងរបួសធ្ងន់ ត្រូវបញ្ជូនទៅសង្រ្គោះនៅមន្ទីរពេទ្យភ្លាមៗ។

ហេតុការណ៍នេះ បានបង្កការភ្ញាក់ផ្អើលកាលពីម៉ោង ១០ និង១៥នាទី ព្រឹកថ្ងៃទី២០ ខែឧសភា ឆ្នាំ២០២០ ស្ថិតនៅតាមបណ្តោយផ្លូវបេតុង ក្នុងភូមិត្រពាំងមៀន សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់ មិនស្គាល់អត្តសញ្ញាណ បើកម៉ូតូសណ្តោងរ៉ឺម៉ក ពាក់ស្លាកលេខភ្នំពេញ1AZ-8563 បើកតាមផ្លូវបេតុង ក្នុងទិសដៅពីជើងទៅត្បូង ខណៈមកដល់ចំណុចកើតហេតុ ដែលជាផ្លូវបំបែកជា៤ ស្រាប់តែមានរថយន្ត Range Rover ពាក់ស្លាកលេខ ភ្នំពេញ 2S-5868 បើកបរដោយស្រ្តីម្នាក់ ក្នុងទិសដៅពីលិចទៅកើត បានបើកឆ្លងផ្លូវជិតផុតទៅហើយ ស្រាប់តែត្រូវម៉ូតូបុកបណ្តាលឲ្យអ្នកបើករុឺម៉កម៉ូតូផ្លោងបោកក្បាលនឹងកញ្ចក់រថយន្តខាងក្រោយ រងរបួសធ្ងន់ ត្រូវបញ្ជូនទៅសង្រ្គោះភ្លាមៗនៅមន្ទីរពេទ្យ។

បន្ទាប់ពីកើតហេតុសមត្ថកិច្ចមូលដ្ឋាន និងជំនាញបានចុះដល់កន្លែងកើតហេតុធ្វើការវាស់វែងយករថយន្ត និងម៉ូតូទៅរក្សាទុករង់ចាំការដោះស្រាយគ្នានៅពេលក្រោយ៕ជ្រោយពេជ្រ