សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ បុរសឈ្មោះ ហ៊ីម ម៉ាត់ អាយុ៦១ឆ្នាំ ជនជាតិខ្មែរអ៊ិស្លាម រស់នៅភូមិសុខសាន្ត ឃុំគរ ស្រុកត្បូងឃ្មុំ ខេត្តត្បូងឃ្មុំបានធ្វេីអត្តឃាតដោយប្រេីខ្សែអង្រឹងចងកដែលសមត្ថកិច្ចអះអាងថា គាត់ខំតស៊ូនឹងជីវិតតែទ្រាំជួបបញ្ហាវិបត្តិផ្លូវចិត្តនិងជំងឺប្រចាំកាយទៀតលែងបាន ក៏សម្រេចចិត្តធ្វើបែបនេះតែម្តង។
ចំពោះករណីបុរសស្លាប់ខាងលេីនេះសមត្ថកិច្ចជំនាញបានចុះមកពិនិត្យកាលពីវេលាម៉ោងប្រមាណ១១ និង៣០នាទីថ្ងៃទី២៦ ខែឧសភាឆ្នាំ២០២០ នៅចំណុចផ្ទះជនរងគ្រោះ ស្ថិតក្នុងភូមិសុខសាន្ត ឃុំគរ ស្រុកត្បូងឃ្មុំ ខេត្តត្បូងឃ្មុំ ។
ពាក់ព័ន្ធនឹងករណីនេះ កម្លាំងជំនាញនៃអធិការដ្ឋាននគរបាលស្រុកត្បូងឃ្មុំ សហការជាមួយកម្លាំងប៉ុស្តិ៍នគរបាលរដ្ឋបាលជីគរ ដោយមានការចូលរួមពីគ្រូពេទ្យមណ្ឌលសុខភាព បានចុះធ្វើ ការពិនិត្យស្រាវជ្រាវ លើសពបុរសដែលស្លាប់នៅចំណុចខាងលេី ហេីយបានពិនិត្យឃេីញថា ជនរងគ្រោះបានធ្វើអត្តឃាតចងក ដោយយកខ្សែអង្រឹងចងកភ្ជាប់ទៅនឹងធ្នឹមផ្ទះ (ផ្ទះតៀម) កម្ពស់២.៥ម៉ែត្រពីដី ដែលហេតុផលគឺជនរងគ្រោះមានវិបត្តិផ្លូវចិត្ត និងជំងឺប្រចាំកាយ ។ ដូច្នេះករណីនេះ សន្និដ្ឋានថា ជនរងគ្រោះពិតជាបានស្លាប់ដោយសារធ្វើអត្តឃាត(ចងក) ប្រាកដមែន ពុំមានពាក់ព័ន្ធនឹងបទល្មើសព្រហ្មទណ្ឌឡើយ។
សពមានឈ្មោះហ៊ីម ម៉ាត់ ភេទប្រុសអាយុ៦១ឆ្នាំ ជនជាតិខ្មែរអ៊ិស្លាម រស់នៅ ភូមិ ឃុំ កើតហេតុខាងលើ។
ក្រោយពីសមត្ថកិច្ចជំនាញបានពិនិត្យរួចរាល់ហើយសពត្រូវបានប្រគល់ជូនក្រុមគ្រួសារ និងសាច់ញាតិធ្វើបុណ្យតាមប្រពៃណី ៕ ដោយ៖វណ្ណៈ
