បុរសម្នាក់បើកម៉ូតូរុឺម៉កកង់បីសុខៗត្រូវរថយន្តមិនចាំម៉ាកបុកពីក្រោយក្រឡាប់ផ្ងារជើងម្ខាងរងរបួសធ្ងន់

ភ្នំពេញ៖ រថយន្តមួយគ្រឿងមិនចាំម៉ាកបើកបោះពួយទៅបុកម៉ូតូរុឺម៉កកង់បីខ្មែរមួយគ្រឿងបណ្តាលឲ្យក្រឡាប់ផ្ងារជើងម្ខាងនិងរបួសធ្ងន់អ្នកបើកបរ ចំណែករថយន្តបង្ករត់គេចខ្លួនបាត់។

ហេតុការណ៍នេះកើតឡើងកាលពីវេលាម៉ោង១២និង ២០ នាទីយប់រំលងអាធ្រាត្រឈានចូលថ្ងៃទី១១ ខែមិថុនា ឆ្នាំ ២០២០ ស្ថិតនៅតាមបណ្ដោយផ្លូវវ៉េងស្រេង ត្រង់ចំណុចមុខ បន្ទាយកងរាជអាវុធហត្ថរាជធានីភ្នំពេញ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញបុរសម្នាក់បើកម៉ូតូរុឺម៉កកង់បីខ្មែរមួយគ្រឿងពណ៌ក្រហមធ្វើដំណើរទិសដៅពីកើតទៅលិចលុះមកដល់ចំណុចកើតហេតុខាងលើក៏មានរថយន្តមួយគ្រឿងមិនចាំម៉ាកនិងស្លាកលេខបានធ្វើដំណើរមកពីក្រោយបុកម៉ូតូរុឺម៉កកង់បីពេញទំហឹងក្រឡាប់ផ្ងារជើងម្ខាងបណ្តាលឲ្យម្ចាស់ម៉ូតូកង់បីខ្ទាតទៅលើចិញ្ចើមផ្លូវរងរបួសធ្ងន់ត្រូវបានរថយន្តសង្រ្គោះមន្ទីរពេទ្យសួគ៌ាដឹកជនរងគ្រោះយកទៅសង្គ្រោះនៅឯមន្ទីរពេទ្យភ្លាមៗ។

ចំណែករថយន្តបង្កមិនបានឈប់ទទួលខុសត្រូវនោះទេបានបន្តដំណើរទៅមុខទៀតគេចខ្លួនបាត់ស្រមោល។

ក្រោយកើតហេតុសមត្ថកិច្ចមូលដ្ឋានចុះមកដល់កន្លែងកើតហេតុរួចក៏បានយកម៉ូតូរុឺម៉កកង់បីទៅរក្សាទុកនៅប៉ុស្តិ៍នគរបាលរដ្ឋបាលស្ទឹងមានជ័យទី១ ទុករងចាំប្រគល់ជូនម្ចាស់វិញ៕

ដោយ៖​ ភារ៉ា​ ដង្កោ