សារព័ត៌មាន នគរវត្ត តែងតែនាំមុខគេជានិច្ច
ទីក្រុងប៉ារីស៖ នៅថ្ងៃទី១២ ខែមិថុនា ប៉ូលិសបារាំង ធ្វើបាតុកម្មនៅមហាវិថីChamps Elysees ក្នុងទីក្រុងប៉ារីសដើម្បីប្រឆាំនិងច្បាប់ហាមប្រាមចាប់ខ្លួនបាតុករដែលបង្កអំពើហិង្សាទៅលើកម្លាំងប៉ូលិស ។
កម្លាំងប៉ូលិសបារាំងបានចតរថយន្ត រាប់សិបគ្រឿង នៅតំបន់ Arc de Triomphe ដោយមានទាំងរថយន្តដឹកទំនិញធុនធំ មានស្លាកបដាសរសេរថា «គ្មានប៉ូលិសគ្មានសន្តិភាព»។ ជាមួយគ្នានោះក៏មានរថយន្តផ្សេងទៀតមានស្លាកបដានិង រូបភាពប៉ូលិសរងរបួស ដែលត្រូវបាតុករវាយប្រហារ។ ស្លាកបដានោះសរសេរថា«អ្នកណាជាអ្នករងគ្រោះពិតប្រាកដ?»។
ជាមួយគ្នានេះដែរ ស្នងការប៉ូលិសទីក្រុងប៉ារីសបានអំពាវនាវដល់បណ្តា ក្រុមហ៊ុន ហាង ភោជនីយដ្ឋាននានា ចាប់តាំងពីតំបន់Republique រហូតដល់ Opera ត្រូវបិទទ្វារក្នុងថ្ងៃទី១៣ ខែមិថុនានេះ ដោយខ្លាចមានបាតុកម្ម បង្កហិង្សា ធ្វើឲ្យបាត់បង់សណ្តាប់ធ្នាប់ ដោយប៉ូលិសមិនអាចតដៃឬចាប់បាតុករបានឡើយ។
គម្រោងបាតុកម្ម នៅថ្ងៃទី១៣ ខែមិថុនា គឺដើម្បីប្រឆាំងការស្លាប់បុរសជនជាតិស្បែកខ្មៅវ័យ២៤ ឆ្នាំឈ្មោះAdama Traoreនៅបារាំងកាលពីឆ្នាំ២០១៦ ដោយយុទ្ធនាការបង្ក្រាបបាតុកររបស់ប៉ូលិស។ ប៉ុន្តែកម្លាំងប៉ូលិស បានច្រានចោល ដោយបញ្ជាក់ថាបុរសជនជាតិស្បែកខ្មៅនោះស្លាប់ដោយជំងឺ ប្រចាំកាយ និងគាំងបេះដូង។ ប៉ុន្តែគ្រួសារជនរងគ្រោះថាយុវជនខាងលើស្លាប់ដោយថប់ដង្ហើម ពេលប៉ូលិសប្រើប្រាស់ឧស្ម័ន បង្ហូរទឹកភ្នែកបំបែកក្រុមបាតុករ។
ការធ្វើបាតុកម្មរបស់កម្លាំងប៉ូលិស កើតឡើងក្រោយពេលដែល រដ្ឋមន្ត្រីក្រសួងមហាផ្ទៃបារាំង លោកChristophe Castaner សន្យាថា នឹងបញ្ចប់សកម្មភាពអំពើហិង្សា ការរើសអើងជាតិសាសន៍ ក្នុងជួរកម្លាំងប៉ូលិស៕ដោយ៖ធី រីណា
