សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មនុស្សប្រុស៤នាក់បានរងរបួសស្រាល និងត្រូវបានសមត្ថកិច្ចឃាត់យកទៅប៉ុស្ដិ៍ផ្សារដេីមថ្កូវក្រោយពីរួមដំណេីរជាមួយគ្នាដោយរថយន្តព្រូសមួយគ្រឿងទៅបុករង្វង់មូលផ្សារដេីមថ្កូវ រួចប្លោងទៅបុកទម្លុះជញ្ចាំងផ្ទះប្រជាពលរដ្ឋបណ្ដាលឲ្យរងការខូចខាតយ៉ាងដំណំ កាលពីវេលាម៉ោង៤ និង៥០នាទីទាបភ្លឺ ថ្ងៃទី១៧ ខែមិថុនា ឆ្នាំ២០២០ ស្ថិតនៅរង្វង់មូលផ្សារដេីមថ្កូវ(នាងមច្ឆា) ក្នុងសង្កាត់ផ្សារដេីមថ្កូវ ខណ្ឌចំការមន រាជធានីភ្នំពេញ។
យោងតាមប្រភពព័ត៌មានពីកន្លែងកេីតហេតុបានឲ្យដឹងថា មុនកេីតហេតុគេក្រឡែកឃេីញរថយន្តបង្កម៉ាកព្រូស ពណ៌ក្រហម ពាក់ស្លាកលេខភ្នំពេញ 2BF-1315 បានបុករង្វង់មូលផ្សារដេីមថ្កូវយ៉ាងពេញទំហឹង រួចបន្តទៅបុកទ្វារផ្ទះប្រជាពលរដ្ឋធ្លុះដល់ខាងក្នុងបណ្ដាលឲ្យរងការខូចខាតសម្ភារៈមួយចំនួនធំ ។
ក្នុងហេតុការណ៍គ្រោះថ្នាក់ចរាចរណ៍នេះ បានធ្វេីឲ្យអ្នកបេីកបរ និងអ្នករួមដំណេីរទាំងអស់៤នាក់រងរបួសស្រាល តែភ្លាមៗក៏ត្រូវបានសមត្ថកិច្ចមូលដ្ឋានចុះទៅឃាត់អ្នកទាំង៤យកមកប៉ុស្ដិ៍នគរបាលរដ្ឋបាល ផ្សារដេីមថ្កូវ ផងដែរ ។
ក្រោយមក ដោយមានការសម្របសម្រួលពីសមត្ថកិច្ច ទេីបម្ចាស់រថយន្តបង្កបានព្រមចេញថ្លៃខូចខាតទាំងស្រុងទៅលេីម្ចាស់ផ្ទះដេីម្បីបញ្ចប់រឿង ។ ដោយឡែងរថយន្តបង្កត្រូវបានសមត្ថកិច្ចជំនាញចរាចរណ៍ចុះមកធ្វេីការវាស់វែងយកទៅរក្សាទុកដេីម្បីរង់ចាំដោះស្រាយ ព្រោះរថយន្តនេះបានបង្កឲ្យខូចខាតដល់សម្បត្តិរដ្ឋ៕ ដោយ៖ ភារ៉ា ដង្កោ
