បេីកបររថយន្តមិនអធ្យាស្រ័យលេីដងផ្លូវ​ បុកប៉ះគ្នាពេញទំហឹង​ រួចប្រកែកយកត្រូវសងខាង

ភ្នំពេញ៖ រថយន្ត២គ្រឿងបើកក្នុងល្បឿនលឿនហើយខ្វះការប្រុងប្រយ័ត្ន ដល់ចំណុចផ្លូវបំបែកជាបួន ចង់ឈ្នះគ្នាបណ្តាលឱ្យបុកគ្នាពេញទំហឹងតែមិនបណ្ដាលឲ្យមនុស្សរងរបួសធ្ងន់ឡើយ។

ហេតុការណ៍នេះកើតឡើងកាលពីវេលាម៉ោង ៨ព្រឹក ថ្ងៃទី១៧ ខែមិថុនា ឆ្នាំ២០២០ តាមបណ្តោយផ្លូវលេខ៦០៦ កែងផ្លូវលេខ៣០៧ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។

តាមប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តមួយគ្រឿងម៉ាកស្តារិច ពណ៌ទឹកប្រាក់ ពាក់ស្លាកលេខ ភ្នំពេញ2AQ-7321 ធ្វើដំណើរតាមបណ្តោយផ្លូវលេខ៦០៦ក្នុង ទិសដៅពីលិចទៅកើត ។
ខណៈពេលមកដល់ផ្លូវបំបែកជាបួន កែងផ្លូវលេខ៣០៧ ស្រាប់តែមានរថយន្តមួយគ្រឿងម៉ាក ឡិចសុីស GS300 ពណ៌ខ្មៅ ពាក់ស្លាកលេខ ភ្នំពេញ 2G-3999 ធ្វើដំណើរតាមបណ្តោយផ្លូវលេខ៣០៧ ក្នុងទិសដៅពីត្បូងទៅជើង ស្រាប់តែរថយន្តទាំង២មកដល់ចំណុចផ្លូវបំបែកជាបួនដូចគ្នា ដោយអ្នកបើករថយន្តទាំង២ចង់ឈ្នះគ្នាបន្តទៅមុខរៀងខ្លូន ក៏បុកគ្នាពេញទំហឹង រួចចុះមកប្រកែកគ្នាយកត្រូវ បង្កការភ្ញាក់ផ្អើលដល់សមត្ថកិច្ច ចុះមកអន្តរាគមន៍។

ក្រោយពេលកើតហេតុ កម្លាំងសមត្ថកិច្ចមូលដ្ឋាន រួមជាមួយកម្លាំងសមត្ថកិច្ចជំនាញបានចុះមកដល់ចំណុចកើតហេតុ និងធ្វើការវាស់វែង យករថយន្តទាំង២ទៅរក្សាទុកនៅការិយាល័យចរាចរណ៍ផ្លូវគោក រងចាំការដោះស្រាយនៅពេលក្រោយ៕អឿន ភារ៉ា