សារព័ត៌មាន នគរវត្ត តែងតែនាំមុខគេជានិច្ច
នាពេលបច្ចុប្បន្ននេះយើងសង្កេតឃើញថា ចំណីអាហារមានសម្បូរហូរហារ រីឯជំងឺក៏វាមានច្រើនតាមនោះដែរ។ ចំណែកយុវវ័យក្នុងសម័យនេះប្រឈមនឹងការកើតជំងឺមនុស្សចាស់ច្រើន នេះបើតាមការលើកឡើងរបស់លោកសាស្រ្តាចារ្យវេជ្ជបណ្ឌិត សេង សេរី ឯកទេសផ្នែកជំងឺទឹកនោមផ្អែម។
លោកសាស្រ្តាចារ្យវេជ្ជបណ្ឌិត សេង សេរី បានឲ្យដឹងថា យុវវ័យឥឡូវឃើញថាមានជួបបញ្ហាសុខភាពដូចជា លើសឈាម លើសជាតិខ្លាញ់ និងទឹកនោមផ្អែមច្រើន គឺបណ្តាលមកពីមូលហេតុសាមញ្ញដែលមនុស្សជាច្រើនជួបប្រទះស្ទើរតែរាល់ថ្ងៃគឺ៖
ទី១. ភាពហូរហៀរនៃការហូបចុក
“ក្មេងៗឥឡូវអាយុត្រឹម២០ឆ្នាំឡើងអីទេ ចាប់ផ្តើមកើតជំងឺ ដែលពីមុនមានតែនៅលើមនុស្សចាស់ ដោយសារតែភាពសម្បូរចំណីអាហារដូចជាអាហារកញ្ចប់ ប៊ឺហ្គឺរ ភីហ្សា ហើយមាននូវភេសជ្ជៈកំប៉ុងច្រើនប្រភេទ ច្រើនជម្រើសដែលបណ្តាលឲ្យមនុស្សឥឡូវឆាប់ធាត់ និងសុទ្ធតែជារបស់មិនល្អ ចំពោះសុខភាព”។
ប្រសាសន៍របស់លោកសាស្រ្តាចារ្យវេជ្ជបណ្ឌិត សេង សេរី
ទី២. កង្វះនូវពលកម្ម
យោងតាមការឲ្យដឹងពីលោកវេជ្ជបណ្ឌិត៖
“ក្មេងៗឥឡូវអាយុត្រឹម២០ឆ្នាំឡើងអីទេ ចាប់ផ្តើមកើតជំងឺដែលពីមុនមានតែនៅលើមនុស្សចាស់ ដោយសារតែសម្បូរចំណីអាហារ ហើយម្នាក់ៗមិនព្រមហាត់ប្រាណបញ្ចេញញើស ជាតិកាឡូរីដែលមាននៅក្នុងខ្លួនទេ។ សម័យនេះម្នាក់ៗហូបច្រើនហើយដេក ដេកច្រើនហើយហូប ទៅណាទៅណីជិះតែម៉ូតូ ឡាន និយាយសាមញ្ញ គឺមនុស្សភាគច្រើនស្រួល ដេកស៊ីៗ។”
ប្រសាសន៍របស់លោកសាស្រ្តាចារ្យវេជ្ជបណ្ឌិត សេង សេរី
លោកសាស្រ្តាចារ្យបានបន្តថា ផ្អែកលើមូលហេតុនេះហើយទើបវាធ្វើឲ្យក្មេងៗឥឡូវងាយប្រឈមនឹងជំងឺកាចៗច្រើនមុខ មិនមែនត្រឹមតែទឹកនោមផ្អែម ឬលើសឈាមទេ ហើយកត្តានៃក្មេងៗឈឺច្រើនអាចកាន់តែកើនឡើងនៅពេលអនាគត។ អ៊ីចឹងហើយ បើមិនចង់ឆាប់ឈឺទេគួររកពេលទៅហាត់ប្រាណបញ្ចេញញើស ឬបើថាគ្មានពេលទេគួររកធ្វើមធ្យោបាយអីធ្វើឲ្យចេញញើសខ្លះក្នុងមួយថ្ងៃ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
