សារព័ត៌មាន នគរវត្ត តែងតែនាំមុខគេជានិច្ច
ក្លឹបនៅ Premier League គឺ Manchester United បានប្រកាសថា កីឡាករ Scott McTominay បានចុះកុងត្រាថ្មីរយៈពេល៥ឆ្នាំជាមួយក្លឹប។ កិច្ចព្រមព្រៀងថ្មីរបស់ខ្សែបម្រើរូបនេះរួមបញ្ចូលទាំងជម្រើសក្នុងការបន្តមួយឆ្នាំទៀតដល់ខែមិថុនា ឆ្នាំ២០២៦។ នេះបើយោងតាមការចេញផ្សាយរបស់ BBC Sport នៅព្រឹកថ្ងៃពុធនេះ។
កីឡាករវ័យ២៣ឆ្នាំរូបនេះបានបង្ហាញខ្លួនគួរឲ្យចាប់អារម្មណ៍ចាប់តាំងពីបានចូលរួមជាមួយក្រុមបិសាចក្រហមកាលពីឆ្នាំ២០១២ បានក្លាយជាកីឡាករដ៏សំខាន់ដំបូងគេចាប់តាំងពីបានបង្ហាញខ្លួនក្រោមការដឹកនាំរបស់លោក Jose Mourinho ក្នុងឆ្នាំ២០១៧ ។
Scott McTominay បាននិយាយតាមរយៈគេហទំព័ររបស់ក្រុមបិសាចក្រហមថា “ស្របពេលដែលខ្ញុំយល់ថាយើងទាំងអស់គ្នាមានរឿងជាច្រើនទៀតដែលត្រូវគិតនៅពេលនេះខ្ញុំ ពិតជារីករាយណាស់ដែលបានចុះហត្ថលេខាលើកិច្ចសន្យាថ្មីនេះ ហើយដើរតួជាផ្នែកមួយនាពេលអនាគតសម្រាប់ក្រុមនេះ” ។
កីឡាកររូបនេះបន្តថា “អ្វីដែលខ្ញុំមិនធ្លាប់ដឹងគឺ United ហើយខ្ញុំសង្ឃឹមថាចំណង់ចំណូលចិត្តរបស់ខ្ញុំចំពោះក្លឹបនេះបង្ហាញរាល់ពេលដែលខ្ញុំឡើងទៅទីលានខ្ញុំនឹងបន្តផ្តល់អ្វីគ្រប់យ៉ាងសម្រាប់ក្លឹបនេះនៅពេលណាដែលខ្ញុំប្រកួត” ។
McTominay បន្ថែមថា “ខ្ញុំចង់ថ្លែងអំណរគុណដល់អ្នកចាត់ការទូទៅចំពោះជំនឿដែលគាត់បានបង្ហាញមកលើរូបខ្ញុំ និងអ្នកទាំងអស់គ្នានៅឯក្លឹបដែលបានជួយខ្ញុំឲ្យទៅដល់កន្លែងដែលខ្ញុំនៅថ្ងៃនេះ។ ខ្ញុំទន្ទឹងរង់ចាំបញ្ចប់រដូវកាលនេះដោយទទួលបានជោគជ័យខ្ពស់និងសង្ឃឹមថាអាចសំរេចគោលបំណងរបស់យើងបាន” ។
គួររំលឹកថា កីឡាករអន្តរជាតិស្កុតឡេន Scott McTominay បង្ហាញខ្លួនបាន៧៥ប្រកួតសំរាប់ក្រុមបិសាចក្រហមក្នុងគ្រប់ការប្រកួតទាំងអស់ដោយរកបាន៦គ្រាប់ ហើយក៏ជាកីឡាករមួយរូបដែលរកគ្រាប់បាល់ពេលទទួលបានជ័យជម្នះ ២-០ លើក្រុម Manchester City ក្នុងការប្រកួតនៅកីឡដ្ឋាន Old Trafford កាលពីខែមីនាកន្លងទៅ ៕ដោយ៖ភារៈ
