សារព័ត៌មាន នគរវត្ត តែងតែនាំមុខគេជានិច្ច
ប្រទេសប៉ាគីស្ថាន៖ខ្មាន់កាំភ្លើងបានប្រើប្រាស់ គ្រាប់បែកនិងកាំភ្លើងបាញ់ប្រហារទៅលើទីតាំងផ្សារភាគហ៊ុននៅក្នុងទីក្រុងការ៉ាជី ប្រទេសប៉ាគីស្ថាន នាថ្ងៃទី ២៩ ខែមិថុនានេះ។ នៅក្នុងការបាញ់ប្រហារនោះ មានមន្ត្រីប៉ូលិសម្នាក់ស្លាប់និងសន្តិសុខពីរនាក់រងរបួស។
សូមបញ្ជាក់ផងដែរថា អគារទីផ្សារមូលបត្រដែលរងការវាយប្រហារនេះ គឺទទួលបានការយាមល្បាតយ៉ាងតឹងតែងបំផុត ដោយនៅទីនោះមានទីតាំងធនាគារឯកជនជាច្រើន។ ទីតាំងផ្សារហ៊ុន (មូលបត្រ)នៅក្នុងទីក្រុងការ៉ាជី មានអាយុកាលយូរបំផុត និងធំបំផុតរបស់ប៉ាគីស្ថាន។
សារព័ត៌មានរ៉យទ័របានដកស្រង់សម្តីស្នងការប៉ូលិសទីក្រុងការ៉ាជី លោកGhulam Nabi Memon ដែលបានបញ្ជាក់ថា «មានខ្មាន់កាំភ្លើង៤នាក់ត្រូវបានសម្លាប់ ខ្មាន់កាំភ្លើងទាំងនោះមកកាន់ទីតាំងវាយប្រហារដោយប្រើរថយន្តកូរ៉ូឡា ពណ៌ខៀវ»។ ក្រុមជំនាញដោះមីន ក៏ដូចជាកម្លាំងប្រឆាំងភេរវកម្មក៏បានបញ្ជូនទៅកាន់ទីតាំងខាងលើផងដែរ។
លោក Rizwan Ahmend អ្នកនាំពាក្យកម្លាំងប៉ូលិសប៉ាគីស្ថានបានឲ្យដឹងថា ខ្មាន់កាំភ្លើងបានឡើងគម្រោងជាយូរណាស់មកហើយក្នុងការវាយប្រហារទៅលើទីតាំង ផ្សារហ៊ុនរបស់ប៉ាគីស្ថាន៕ដោយ៖ធី រីណា
