សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បេីករថយន្តស៊េរីទំនេីបម៉ាកRange Rover មួយគ្រឿង បានជ្រុលទៅបុករថយន្តកុងតឺន័រដែលកំពុងបត់ឆ្លងផ្លូវត្រឡប់ក្រោយយ៉ាង ពេញទំហឹងបណ្ដាលឲ្យរងការខូចខាតផ្នែកខាងមុខយ៉ាងដំណំ ។
ហេតុការណ៍គ្រោះថ្នាក់ចរាចរណ៍ខាងលេីនេះបានកេីតឡេីងកាលពីវេលាម៉ោង៩ និង៣០នាទីយប់ថ្ងៃទី៨ ខែកក្កដា ឆ្នាំ២០២០ ស្ថិតនៅតាមបណ្ដោយផ្លូវវិមានឈ្នះ=ឈ្នះ ក្នុងសង្កាត់បាក់ខែង ខណ្ឌជ្រោយចង្វា រាជធានីភ្នំពេញ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនកេីតហេតុគេឃេីញរថយន្តកុងតឺន័រ ពាក់ស្លាកលេខ រតនគិរី 3A-1151 បើកតាមបណ្ដោយផ្លូវវិមានឈ្នះ=ឈ្នះ ក្នុងទិសដៅពីកេីតទៅលិច ។ លុះមកដល់ចំណុចកេីតហេតុរថយន្តនេះក៏បានបន្ថយល្បឿនដេីម្បីបត់ឆ្លងផ្លូវត្រឡប់ក្រោយវិញ តែពេលបត់បានបន្តិចក៏មានរថយន្តស៊េរីទំនេីបម៉ាក Range Rover ពណ៌សំបកឪឡឹក ពាក់ស្លាកលេខភ្នំពេញ 2BD-6292 ដែលបេីកបរដោយបុរសម្នាក់ស្របទិសគ្នាក្នុងល្បឿនលឿនក៏ជ្រុលទៅបុករថយន្តកុងតឺន័រចំពីក្រោយពេញទំហឹង បណ្ដាលឲ្យរថយន្តRange Rover ខ្ទេចមួយកំណាត់មុខ និងធ្វេីឲ្យអ្នកបើកបររងរបួសត្រូវបានរថយន្តសាមុយដឹកបញ្ជូនទៅកាន់មន្ទីរពេទ្យភ្លាមៗ ។ ចំណែកតៃកុងរថយន្តកុងតឺន័របានអែបរថយន្តនៅចិញ្ចេីមផ្លូវចុះគេចខ្លួនបាត់ស្រមោល ។
ក្រោយកើតហេតុ សមត្ថកិច្ចមូលដ្ឋានបានចុះមកដល់ដេីម្បីត្រួតពិនិត្យ រួចទាក់ទងទៅសមត្ថកិច្ចជំនាញចរាចរណ៍ នៃស្នងការដ្ឋាននគរបាលរាជធានីភ្នំពេញ ឲ្យចុះមកធ្វេីការវាស់វែងយករថយន្តទាំង២គ្រឿងទៅរក្សាទុក រង់ចាំដោះស្រាយនាពេលក្រោយ ៕
ដោយ៖ ភារ៉ា ដង្កោ
