រុស្សុី៖ ពលរដ្ឋរាប់សិបពាន់នាក់នៅទីក្រុង Khabarovsk បាននាំគ្នាធ្វើបាតុកម្មនៅថ្ងៃទី១១ខែកក្កដា ដើម្បីប្រឆាំងនឹងការចាប់ខ្លួនអភិបាលរដ្ឋKhabarovsk ដោយចោទប្រកាន់ជាប់ពាក់ព័ន្ធនឹងការសម្លាប់មនុស្សកាលពី២០ឆ្នាំមុន។
តុលាការទីក្រុងមូស្គូកាលពីថ្ងៃទី១០ខែ កក្កដា បានចេញសាលក្រម ឃុំខ្លួនលោកSergei Furgal អាយុ៥០ឆ្នាំ ជាបណ្តោះអាសន្ន រយៈពេល២ខែដើម្បីកាត់ទោស។
លោកSergei Furgal រងការចោទប្រកាន់ថាជាអ្នកនៅពីក្រោយការស្លាប់អ្នកជំនួញកាលពី១៥-២០ឆ្នាំមុន។
ប៉ុន្តែលោកSergei Furgal បានច្រាលចោលការចោទប្រកាន់ ខាងលើ ។ ចំណែកគណបក្សប្រឆាំង សេរីភាពប្រជាធិបតេយ្យ(LPDR) របស់លោកSergei Furgal បញ្ជាក់ថា លោកពិតជាគ្មានទោសឡើយ។ក្រុមអ្នកគាំទ្រប្រមាណ៣៥ពាន់នាក់បានចូលរួមធ្វើបាតុកម្មប្រឆាំងនឹងការចាប់ខ្លួនខាងលើ។
តាមគេហទំព័រ DVHab.ru បានផ្សាយថា នេះជាការធ្វើបាតុកម្មទ្រង់ទ្រាយធំបំផុតមិនធ្លាប់មាននៅក្នុងប្រវត្តិសាស្ត្រ តំបន់Khabarovsk។ ក្រុមបាតុករបានបង្កឲ្យមានការកកស្ទះចរាចរណ៍នៅតាមដងផ្លូវជាច្រើនក្នុងតំបន់នេះ។
លោក Furgal បានជាប់ឆ្នោតជាអភិបាលរដ្ឋ Khabarovskកាលពីឆ្នាំ២០១៨ ក្រោយយកឈ្នះទៅលើបេក្ខភាពមកពីគណបក្សកាន់អំណាចរបស់ប្រធានាធិបតីពូទីន៕ដោយ៖ធី រីណា