សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យុវជនជាសិស្សសាលា៤នាក់បានរងរបួសធ្ងន់និងស្រាលដោយសារគ្រោះថ្នាក់ចរាចរណ៍រវាងរថយន្តបត់ត្រឡប់ក្រោយខ្វះការប្រុងប្រយ័ត្នបុកជាមួយម៉ូតូពេញទំហឹងបង្កការភ្ញាក់ផ្អើលដល់អ្នកភូមិទាំងយប់។
ហេតុការណ៍នេះបានកើតឡើងកាលពីវេលាម៉ោង៨និង៥នាទីយប់
ថ្ងៃទី១៥ ខែកក្កដា ឆ្នាំ២០២០ស្ថិតលើផ្លូវលេខ ៣១៤ ក្នុងភូមិថ្មី សង្កាត់សង្ឃ័រ ក្រុង ស្វាយរៀង ។
សមត្ថកិច្ចនគរបាលក្រុងស្វាយរៀងបានឱ្យដឹងថា យុវជនរងគ្រោះមាន៖
ទី១.មានឈ្មោះ ជា ប៉ូលីន អាយុ ១៨ឆ្នាំ មុខរបរសិស្ស រស់នៅភូមិ វាលយន្ដ សង្កាត់ស្វាយរៀង ក្រុងស្វាយរៀង ។
ទី២.មានឈ្មោះ ចាន់ សុខសាន្ដ អាយុ ១៥ឆ្នាំ មុខរបរសិស្ស រស់នៅភូមិ ឃោសាង សង្កាត់ស្វាយតឿ ក្រុង ស្វាយរៀង ខេត្តស្វាយរៀង ។
ទី៣.ឈ្មោះ សៀម ខេវិន អាយុ ១៥ឆ្នាំ មុខរបរសិស្ស រស់នៅភូមិគយត្របែក សង្កាត់ គយត្របែក ក្រុងស្វាយរៀង ខេត្ត ស្វាយរៀង។
ទី៤.ឈ្មោះ ឡុង ភក្ដី អាយុ ១៥ឆ្នាំ មុខរបរសិស្ស រស់នៅភូមិវាលយន្ដ សង្កាត់ស្វាយរៀង ក្រុងស្វាយរៀង ខេត្ត ស្វាយរៀង ។
ចំណែកអ្នកបើករថយន្តត្រូវបានគេស្គាល់ឈ្មោះគង់ សុផាត ភេទ ប្រុស អាយុ៣៤ឆ្នាំ មុខរបរមេការសំណង់ រស់នៅភូមិត្របែក ឃុំស្វាយជ្រំ ស្រុកស្វាយជ្រំ ខេត្តស្វាយរៀង ខណៈឃើញសភាពការណ៍មិនស្រួលក៏រត់គេចខ្លួនភ្លាមៗបន្សល់តែរថយន្តម៉ាកសុីណា ពណ៌ស ពាក់ស្លាកលេខភ្នំពេញ ២BA -១៥០៨ នៅនឹងកន្លែងកើតហេតុ។
បើតាមអ្នកភូមិបានឱ្យដឹងថា មុនកើតហេតុមានរថយន្តមួយគ្រឿងម៉ាកសុីណា ពណ៌ស ពាក់ស្លាកលេខ ភ្នំពេញ ២BA-១៥០៨ ធ្វើដំណើរពីលិចទៅកើតលើផ្លូវលេខ៣១៤ ខណៈនោះក៏បានបត់រថយន្តត្រឡប់ក្រោយ ស្រាប់តែមានម៉ូតូមួយគ្រឿងម៉ាកស៊ុយហ្ស៊ុយគី Nex ពណ៌ ទឹកប្រាក់ ពាក់ស្លាកលេខ ស្វាយរៀង ១N -៦៧៣០ ជិះគ្នា៤នាក់មិនពាក់មួកសុវត្ថិភាពមកពីក្រោយស្របទិសគ្នាចាប់ហ្វ្រ័ងមិនទាន់ក៏បុកពេញទំហឹងបណ្ដាលឱ្យអ្នកបើកម៉ូតូបោកក្បាលនឹងកញ្ចក់រថយន្តតែម្ដង។
ក្រោយមកអ្នករងរបួសត្រូវបានក្រុមគ្រួសារបញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តស្វាយរៀង ចំណែកមធ្យោបាយធ្វើដំណើរទាំង២គ្រឿងត្រូវបានសមត្ថកិច្ចវាស់វែងនិងអូសយកទៅរក្សាទុកនៅអធិការដ្ឋាននគរបាលក្រុងស្វាយរៀង ដើម្បីដោះស្រាយនាពេលក្រោយ៕ យឹម សុថាន
