សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តារាសម្តែង និងពិធីករវ័យក្មេង លោក យ៉ា រ៉ូ បាននិងកំពុងទាក់ទាញចំណាប់អារម្មណ៍ខ្លាំងពីទស្សនិកជនក្រោយពីលោកក្តាប់បានឱកាសការងារជាច្រើនបន្តបន្ទាប់។ បើទោះបីជាស្ថិតក្នុងដំណាក់កាលនៃបញ្ហាការរាតត្បាតនៃវីរុសកូវីដ-១៩នៅកម្ពុជាក៏តារាប្រុសរូបនេះនៅតែចេញមុខជាបន្តបន្ទាប់លើការងារសិល្បៈដដែល។
ហាងឆេងការងារតាមអនឡាញរបស់យ៉ារ៉ូនៅតែធ្វើឲ្យគេចាប់អារម្មណ៍ ដោយលោកនៅតែទទួលបានការងារប្រម៉ូតផលិតផលជាបន្តបន្ទាប់ មិនស្ងួតស្តូរី និងគណនី Facebook, Instagram នោះឡើយ។ អ្វីដែលពិសេសផងដែរនោះអ្នកនិយមប្រើប្រាស់ Facebook, Instagram តែងឃើញលោកប្រើប្រាស់ទេពកោសល្យយ៉ាងប៉ុិនប្រសព្វ ដើម្បីរៀបរាប់ពីអត្ថប្រយោជន៍ វិធីការប្រើប្រាស់នៃផលិតផលអ្វីមួយ បង្កភាពងាយស្រួលដល់អ្នកគាំទ្ររបស់លោកឆាប់យល់ និងដឹងពីគុណភាព។ ថ្មីៗនេះ លោកបានចាប់ដៃជាមួយស្រីស្រស់ប្រុសស្អាតជាច្រើននាក់ផ្សេងទៀតផលិតជាវីដេអូបែបកំប្លុកកំប្លែងប្លែកៗ បង្ហោះលើប្រព័ន្ធអុីនធឺណេតយ៉ាងព្រោងព្រាតថែមទៀតផង ដោយវីដេអូទាំងនោះពិតជាទទួលបានការគាំទ្រខ្លាំងពីយុវវ័យ ។ លោកបញ្ជាក់ថា ការងារសិល្បៈមួយរយៈចុងក្រោយនេះនៅតែមមាញឹកខ្លាំងពិសេសការថតផ្សព្វផ្សាយផលិតផលនានា ដែលលោកចាត់ទុកថាជាជោគជ័យបន្តសម្រាប់លោកបើទោះបីជាស្ថិតក្នុងស្ថានភាពនៃជំងឺកូវីដ-១៩ក៏ដោយ។ លោកបញ្ជាក់ដែរថាវីដេអូប្លែកៗគឺជាអ្វីដែលទស្សនិកជនពិសេសក្រុមយុវវ័យពេញចិត្តហើយលោកនឹងបញ្ចេញវីដេអូថ្មីៗបន្តទៀតនៅពេលដ៏ខ្លីខាងមុខ៕
ដោយ៖វឌ្ឍនា
