មុខមាត់ស្អាតបែជាវិកលចរិក យកផ្គាក់ភ្ជង់គំរាមអារ-កសម្លាប់មីង និងបើកឡានយកទៅប្លុងចោល

ខេត្តសៀមរាប៖ មានករណី បុរសវិកលចរិតម្នាក់ បានយកផ្គាក់ភ្ជង់គំរាមអារ-កសម្លាប់មីង ដើរកាប់រថយន្តតាមផ្លូវ និងបើកឡាន Mazda មួយគ្រឿងយកទៅប្លុងចោលនាំឲ្យផ្អើលនៅខេត្តសៀមរាប ។ ហេតុការណ៍នេះបានកើតឡើងនៅព្រឹកថ្ងៃទី១៨ ខែកក្កដា ឆ្នាំ២០២០ នៅភូមិវិហារចិន សង្កាត់ស្វាយដង្គំ ក្រុងសៀមរាប។

សមត្ថកិច្ចបានឱ្យដឹងថា៖ បុរសវិកលចរិតឈ្មោះ អែម បញ្ញា អាយុ២៨ឆ្នាំ មានទីលំនៅភូមិវិហារចិន សង្កាត់ស្វាយដង្គំ ក្រុងសៀមរាប ខេត្តសៀមរាប បានយកផ្គាក់ភ្ជង់ និងគំរាមអាករសម្លាប់មីងបង្កើតឈ្មោះ អែម ចន្ទ័សូឡី អាយុ៤៧ឆ្នាំ។
សមត្ថកិច្ចបន្តថា៖ ក្រោយមកមីងបង្កើតក៏បានរត់គេចខ្លួនបាន ហើយឈ្មោះ អែម បញ្ញា បានបន្តសកម្មភាពយកផ្គាក់ដេញកាប់ឡាន តាមដងផ្លូវ រហូតដល់ចំណុចលក់ដែកស្ថិតនៅភូមិវិហារចិន សង្កាត់ស្វាយដង្គំ ក្រុងសៀមរាប ជននេះបានកាប់ឡានមួយគ្រឿងប្រភេទ Morning ពណ៌ក្រហម ចំនួនពីរកាំបិតបណ្ដាលឲ្យ បែកកញ្ចក់ឡានខាងមុខ ធ្វើឲ្យម្ចាស់រថយន្តភ័យខ្លាំង ក៏រត់គេចខ្លួនបាត់ទៅ។
តាមរបាយការណ៍សមត្ថកិច្ចបញ្ជាក់ទៀតថា៖ បន្ទាប់មកជនសង្ស័យក៏បានបន្តសកម្មភាពដើររហូតដល់ចំណុចកន្លែងកាត់សក់ស្ថិតនៅភូមិវិហារចិន សង្កាត់ស្វាយដង្គំ ក្រុងសៀមរាប ក៏បានឃើញរថយន្តម៉ាក Mazda ពណ៌ស ពាក់ផ្លាកលេខភ្នំពេញ 2BG-4431 ក៏បានយកផ្គាក់កាប់មកលើកញ្ចក់ឡានចំនួនមួយកាំបិត បណ្ដាលឱ្យបែកកញ្ចក់ឡានខាងមុខ ហើយគំរាមម្ចាស់ឡានឲ្យចុះពីលើឡាន រួចក៏យកឡានរបស់ជនរងគ្រោះជិះចេញបាត់ទៅ។
ក្រោយកើតហេតុ ជនរងគ្រោះបានមកប្តឹងនៅប៉ុស្តិ៍ដើម្បីរាយការណ៍ដល់សមត្ថកិច្ច។ ម្ចាស់រថយន្តបានបញ្ជាក់ថា នៅក្នុងរថយន្តមានលុយជិត ៧ពាន់ដុល្លារ, ទូរស័ព្ទមួយគ្រឿងម៉ាក Oppo ពណ៌ខ្មៅ និងកាតគ្រីម៉ូតូមួយសន្លឹក។
លោក លឹម សម្បត្តិ អធិការនគរបាលស្រុកប្រាសាទបាគង បានឲ្យដឹងថា ៖ ជននេះបានយករថយន្តមួយគ្រឿងនេះទៅប្លុងចោលនៅភូមិថ្នល់បាក់ ឃុំអំពិល ស្រុកប្រាសាទបាគង ហើយត្រូវបាន សមត្ថកិច្ចរកឃើញហើយ តែជនសង្ស័យបានរត់គេចខ្លួនបាត់ ខណៈកម្លាំងសមត្ថកិច្ចកំពុងស្រាវជ្រាវតាមចាប់ខ្លួន។
គេកំពុងដាក់ភាពសង្ស័យថា បើជនសង្ស័យជាមនុស្សវិកលចរិក ហេតុអីចេះបើកឡាន និងធ្វើសកម្មភាពដូចឧក្រិដ្ឋជន ហើយចេះគេចខ្លួនពីសមត្ថកិច្ច ខ្លាចពីគុកច្រវ៉ាក់នោះ៕ដោយ៖សិលា