សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ទាហានថៃ២នាក់ ដែលទើបតែត្រឡប់មកពីធ្វើសមយុទ្ធយោធានានៅក្នុងសហរដ្ឋអាមេរិក ត្រូវបានធ្វើតេស្តវិជ្ជមានជាមួយនឹងជំងឺកូវីដ-១៩។នេះបើតាមការបញ្ជាក់ពី អាជ្ញាធរសុខាភិបាលថៃប្រកាសកាលពីថ្មីៗនេះ ។
បើតាមការបញ្ជាក់របស់មជ្ឈមណ្ឌលគ្រប់គ្រងស្ថានភាពជំងឺកូវីដ- ១៩ ថៃបានឲ្យដឹងថា នាយទាហានទាំង ២ នាក់នេះគឺសុទ្ធតែជាបុរសដែលម្នាក់មានអាយុ ២២ ឆ្នាំ និងម្នាក់ទៀតមានអាយុ ២៥ ឆ្នាំ និងបានត្រឡប់មកពីរដ្ឋហាវ៉ៃ សហរដ្ឋអាមេរិក កាលពីថ្ងៃទី ២២ កក្កដា កន្លងមកនេះហើយពេលនេះពួកគាត់ទាំង ២ នាក់កំពុងត្រូវបានដាក់ឲ្យនៅដាច់ដោយឡែកក្នុងមន្ទីរពេទ្យក្រុងបាងកកដើម្បីទទួលបានការព្យាបាល។
គួរបញ្ជាក់ថា ប៉ុន្មានថ្ងៃមុននេះក៏មាននាយទាហានថៃចំនួន ៦ នាក់ផ្សេងទៀតដែលធ្វើដំណើរតាមជើងហោះជាមួយគ្នាក៏ត្រូវបានគេធ្វើតេស្តវិជ្ជមានជាមួយនឹងជំងឺកូវីដ-១៩ ដែរ ហើយពួកគាត់ទាំង ៦ នាក់ត្រូវបានគេដាក់ឲ្យនៅដាច់ដោយឡែកក្នុងមន្ទីរពេទ្យខេត្តចនបូរីដើម្បីទទួលបានការព្យាបាល។
បើគិតមកទល់នឹងពេលនេះ ប្រទេសថៃមានអ្នកជំងឺកូវីដ-១៩ សរុបចំនួន៣២៩៧ ករណី ។ ចំណែកអ្នកស្លាប់មានចំនួន ៥៩ ករណី និងជាសះស្បើយចំនួន ៣ ១១១ ករណី៕ដោយ៖ស តារា
