សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនម្នាក់បើករថយន្តយ៉ាងលឿនរេចង្កូតទៅបុកបង្គោលភ្លើងបណ្តាលឲ្យរថយន្តរងការខូចខាតខ្ទេចអស់មួយកំណាត់ខាងមុខ។
ហេតុការណ៍នេះបានកើតឡើងនៅវេលាម៉ោង៤ទៀបភ្លឺ ថ្ងៃទី៣០ ខែកក្កដា ឆ្នាំ២០២០ នៅនៅតាមបណ្តោយផ្លូវលេខ៣៣៥ ខាងមុខផ្ទះលេខ43 ស្ថិតនៅក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេបានឃើញយុវជនម្នាក់មិនស្គាល់អត្តសញ្ញាណបើករថយន្តស៊េរីទំនើបម៉ាកតូយ៉ូតា សុីណា ពណ៌ទឹកប្រាក់ ពាក់ស្លាកលេខភ្នំពេញ2T-1962 បើកតាមបណ្តោយផ្លូវលេខ៣៣៥ក្នុងទិសដៅពីត្បូងទៅជើង ខណៈមកដល់ចំណុចកើតហេតុបានរេចង្កូតជ្រុលទៅបុកបង្គោលភ្លើងទ្រេតអស់មួយដើម ចំណែករថយន្តរងការខូចខាតអស់មួយកំណាត់មុខផ្ទុះពោងទៅមុខលែងរួច ហើយភ្លាមៗនោះអ្នកបើកបររថយន្តបានទុករថយន្តចោលរួចឡើងជិះរថយន្តមិត្តភក្តិគេចខ្លួនបាត់ទៅ។
បន្ទាប់ពីកើតហេតុសមត្ថកិច្ចជំនាញចរាចរណ៍បានមកស្ទូចយករថយន្តបង្កទៅរក្សាទុកនៅអធិការដ្ឋាននគរបាលខណ្ឌទួលគោករង់ចាំដោះស្រាយគ្នានាពេលក្រោយ៕ ជ្រោយពេជ្រ
