សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានហេតុការណ៍ដ៏គួរឱ្យភ្ញាក់ផ្អេីលមួយបានកេីតឡេីង ខណៈបុរសម្នាក់សង្ស័យស្រវឹងស្រាបានបើករថយន្តតូយ៉ូតាព្រូសបោះពួយយ៉ាងលឿនទៅបុកខឿនសួនទឹក រួចហោះរំលងសួនទៅបុកទូ(ATM)បែកបាក់ខ្ទេចខ្ទី ចំណែករថយន្តខូចខាតស្ទើរតែទាំងស្រុង ។
ករណីគ្រោះថ្នាក់ចរាចរណ៍នេះបានកេីតឡេីងកាលពីវេលាម៉ោង៣និង១០នាទីទៀបភ្លឺ ឈានចូលថ្ងៃទី៣១ ខែកក្តដា ឆ្នាំ២០២០ នៅចំណុចច្រកចូលអគារអូឡាំព្យា ក្នុងសង្កាត់វាលវង់ ខណ្ឌ៧មករា រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសម្នាក់បើករថយន្តតូយ៉ូតាព្រូស មួយគ្រឿង ពណ៌ស ពាក់ស្លាកលេខភ្នំពេញ2BB-5739 តាមបណ្ដោយផ្លូវលេខ១៦៩ ក្នុងទិសដៅពីជើងទៅត្បូង លុះមកដល់ផ្លូវបំបែកជាប្រាំ រថយន្តនេះបានរត់ទៅត្រង់បុកខឿនសួនទឹករាំ រួចហោះរំលងសួនជាច្រើនម៉ែត្រទៅបុកទូATMនៅចំណុចមុខច្រកចូលអគារអូឡាំព្យាដែលមានបីទូជាប់ៗគ្នា បណ្តាលឲ្យមួយទូបែកបាក់ខ្ទេចខ្ទីខូចខាតស្ទើរតែទាំងស្រុង ចំណែករថយន្តបង្កបានបែកកង់ទាំង៤ និងខូចខាតផ្នែកខាងមុខយ៉ាងដំណំផងដែរ ដោយបង្កឲ្យមានការភ្ញាក់ផ្អើលដល់សន្តិសុខដែលយាមនៅកន្លែងកើតហេតុបាននាំគ្នាធ្វើការឃាត់ខ្លួនអ្នកបើកបររថយន្តទុកប្រគល់ជូនសមត្ថកិច្ច។ បន្ទាប់មកសមត្ថកិច្ចមូលដ្ឋានបានចុះមកដល់ហេីយនាំខ្លួនម្ចាស់រថយន្តបង្កទៅកាន់អធិការដ្ឋាននគរបាលខណ្ឌ៧មករា ដើម្បីរង់ចាំដោះស្រាយតាមនីតិវិធី ។
ក្រោយមកទៀត សមត្ថកិច្ចជំនាញចរាចរណ៍ខណ្ឌ៧មករា បានទំនាក់ទំនងទៅជំនាញចរាចរណ៍ផ្លូវគោក នៃស្នងការដ្ឋាននគបាលរាជធានីភ្នំពេញ ចុះមកធ្វើការវាស់វែងយករថយន្តបង្កទៅរក្សាទុកដើម្បីរង់ចាំដោះស្រាយគ្នាតាមផ្លូវច្បាប់៕ដោយ៖ ភារ៉ា ដង្កោ
