សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ សេតវិមានអាមេរិក និងក្រុមឃោសនាបោះឆ្នោតរបស់ប្រធានាធិបតីអាមេរិកដូណាល់ ត្រាំ បានប្រកាស នៅថ្ងៃទី៣ខែសីហា ថា ការបោះឆ្នោតនឹងត្រូវធ្វើឡើងតាមពេលវេលា ដែលបានគ្រោងទុកគឺនៅ ថ្ងៃទី៣ ខែវិច្ឆិកា ឆ្នាំ២០២០។
ប្រធានការិយាល័យសេតវិមានលោកMark Meadows បានប្រកាសថា ប្រធានាធិបតី ដូណាល់ ត្រាំបង្ហាញក្តីបារម្ភពីការបោះឆ្នោតតាមរយៈប្រៃសណីយ៍ មិនមែនពន្យារពេលបោះឆ្នោតនោះឡើយ។
លោកMark Meadows បញ្ជាក់នៅក្នុងកម្មវិធី“Face the Nation” របស់បណ្តាញព័ត៌មានCBSថា«យើងនឹងបោះឆ្នោតនៅថ្ងៃទី ៣ខែវិច្ឆិកា ហើយប្រធានាធិបតីត្រាំ នឹងបន្តទទួលបានជ័យជម្នះ»។
ជាមួយគ្នានេះដែរ ទីប្រឹក្សា យុទ្ធនាការឃោសនារបស់ប្រធានាធិបតី គឺលោកJason Miller បាននិយាយនៅក្នុងកម្មវិធី “Fox News Sunday” កាលពីថ្ងៃអាទិត្យកន្លងមកថា ប្រធានាធិបតីដូណាល់ ត្រាំ ចង់បានការបោះឆ្នោតធ្វើឡើងនៅថ្ងៃទី៣ខែវិច្ឆិកា។
កាលពីសប្តាហ៍កន្លងមក ប្រធានាធិបតីដូណាល់ ត្រាំ បានស្នើឲ្យពន្យារពេលបោះឆ្នោតនៅអាមេរិក ប៉ុន្តែទទួលរងការប្រតិកម្មយ៉ាងខ្លាំងពីគណបក្សប្រជាធិបតេយ្យ ។ ក្រុមអ្នករិះគន់លោកត្រាំ បានបញ្ជាក់ថា សកម្មភាពស្នើពន្យារពេលបោះឆ្នោត គឺដើម្បីបង្វែរទិសដៅការចាប់អារម្មណ៍មកលើការបោះឆ្នោត ជាជាង ការចាប់អារម្មណ៍ទៅលើ ការបរាជ័យក្នុងការដឹកនាំរបស់លោកត្រាំ ពិសេសគឺបញ្ហាសេដ្ឋកិច្ចជាតិ៕ដោយ៖ធី រីណា
