សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅយប់ថ្ងៃចន្ទ ១៤កើត ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី៣ ខែសីហា ឆ្នាំ២០២០រដ្ឋបាលខណ្ឌចំការមន ដឹកនាំដោយលោក ថេង សុថុល អភិបាល នៃគណៈអភិបាលខណ្ឌចំការមន បានសហការជាមួយមន្ទីរទេសចរណ៍រាជធានីភ្នំពេញ ចុះត្រួតពិនិត្យទីតាំងអាជីវកម្មចំនួន ២កន្លែង រួមមាន ក្លិបកម្សាន្ត EPIC និងភោជនីយដ្ឋាន ហ៊ូថោវលី ដែលស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ក្រោយពីក្រុមការងារត្រួតពិនិត្យរួចមក ឃើញថា៖
-ក្លិបកម្សាន្ត EPIC បានកែប្រែពីក្លិបកម្សាន្តមកជាភោជនីយដ្ឋានតាមលិខិតអនុញ្ញាតរបស់រដ្ឋបាលរាជធានីភ្នំពេញ ដោយបានដាក់តុអាហារគម្លាតពីគ្នា មានម៉ាស៊ីនស្គេនកម្ដៅនៅច្រកទ្វារចូល និងមានម៉ាស៊ីនសម្លាប់មេរោគទាំងច្រកចេញ ទាំងច្រកចូល ដើម្បីការពារ និងទប់ស្កាត់ការរីករាលដាលជំងឺកូវីដ-១៩។
-ចំពោះភោជនីយដ្ឋាន ហ៊ូថោវលីវិញ ក្រុមការងារបានឃើញថា ទីតាំងខាងលើនេះមិនមានលិខិតអនុញ្ញាតដើម្បីប្រកបអាជីវកម្មនោះទេ ហើយក្រុុមការងារបានណែនាំឱ្យម្ចាស់អាជីវកម្មទៅស្នើសុំលិខិតអនុញ្ញាតប្រកបអាជីវកម្ម និងត្រូវគោរពតាមការណែនាំរបស់រាជរដ្ឋាភិបាល និងក្រសួងសុខាភិបាល ក្នុងករណីម្ចាស់អាជីវកម្មមិនអនុវត្តតាមការណែនាំរបស់ក្រុមការងារនោះទេ ក្រុមការងារនឹងចាត់វិធានការរដ្ឋបាល៕ ដោយ៖ជីណា
