សារព័ត៌មាន នគរវត្ត តែងតែនាំមុខគេជានិច្ច
ប្រទេសហ្វីលីពីន៖ តាមច្បាប់បម្រាមថ្មីដើម្បីទប់ស្កាត់ការឆ្លងកូវីដ-១៩ រដ្ឋាភិបាលហ្វីលីពីនបានសម្រេចឲ្យផ្អាករាល់សេវាកម្មដឹកជញ្ជូនសាធារណៈ ហើយភោជនីយដ្ឋានបានត្រឹមតែដឹកជញ្ជូនអាហារទៅតាមផ្ទះតែប៉ុណ្ណោះ។ ចំណែក ហាងកាត់សក់ កែសម្ផស្ស…ត្រូវបិទទ្វារ។
កម្លាំងប៉ូលិសនិងទាហាន ហ្វីលីពីនបានដាក់ពង្រាយនៅទីក្រុងម៉ានីលដើម្បីត្រួតពិនិត្យការអនុវតច្បាប់បិទទីក្រុងទប់ស្កាត់ការឆ្លងរាលដាលកូវីដ-១៩ តាមការអំពាវនាវរបស់ក្រុមគ្រូពេទ្យ ក្រោយមានអ្នកឆ្លងច្រើនបំផុតមិនធ្លាប់មាន។
ទីក្រុងម៉ានីល ជាមជ្ឈមណ្ឌលសេដ្ឋកិច្ចជាតិ និងជាទីកន្លែងរស់នៅរបស់ពលរដ្ឋជាង២៨លាននាក់ ស្មើ១ភាគ៤នៃពលរដ្ឋសរុប។ ច្បាប់បិទទីក្រុងជាថ្មី មានរយៈពេលតែ២សប្តាហ៍ប៉ុណ្ណោះ ដោយចាប់ផ្តើមឡើងនៅថ្ងៃទី ៤ខែសីហានេះ។
ពលរដ្ឋនៅក្នុងទីក្រុងទាំងអស់ត្រូវស្នើឲ្យនៅក្នុងផ្ទះ ហើយក្នុងមួយគ្រួសារមានសមាជិកតែម្នាក់ប៉ុណ្ណោះ មានសិទ្ធិចេញក្រៅដើម្បីទិញអាហារនិងសម្ភារប្រើប្រាស់ចំាបាច់តែប៉ុណ្ណោះ។
ការកាត់បន្ថយការរឹតត្បិតកាលពីខែមិថុនា ដើម្បីដំណើរការសេដ្ឋកិច្ចវិញបានធ្វើឲ្យហ្វីលីពីនប្រឈមនិងការឆ្លងកើនឡើង៦ដង សរុបមានអ្នកឆ្លង 112.593នាក់ និងស្លាប់ ២១០០នាក់ផងដែរ។
ក្រសួងសុខាភិបាលហ្វីលីពីនបានប្រកាសនៅថ្ងៃទី ៤ខែសីហា ថា ក្នុងរយៈពេល២៤ម៉ោង រកឃើញអ្នកឆ្លងកូវីដ-១៩ កើនឡើងដល់ទៅ 6.352 ជាចំនួនខ្ពស់បំផុតមិនធ្លាប់មាន មិនត្រឹមតែនៅក្នុងប្រទេសហ្វីលីពីននោះឡើយគឺនៅតំបន់អាស៊ានទាំងមូល៕
ដោយ៖ធី រីណា
