សារព័ត៌មាន នគរវត្ត តែងតែនាំមុខគេជានិច្ច
ស្កុតឡែន៖ នាយករដ្ឋមន្ត្រីអង់គ្លេស លោក Boris Johnson កាលពីថ្ងៃទី១២ខែសីហា បានបញ្ជាក់ថា ក្រុមជំនាញត្រូវតែបញ្ជាក់ឲ្យបានច្បាស់ពីមូលហេតុដែលបណ្តាលឲ្យមានគ្រោះថ្នាក់រថភ្លើងធ្លាក់ពីផ្លូវសម្លាប់មនុស្ស៣នាក់ និងរបួសជាច្រើននាក់នៅស្កុតឡែន។
ក្នុងថ្ងៃជាមួយគ្នានោះដែរអ្នកនាំពាក្យប៉ូលិសចរាចរណ៍អង់គ្លេសលោកBrian McAleese បានឲ្យដឹងថា ប៉ូលិសទទួលបានការហៅទូរស័ព្វស្តីពីគ្រោះថ្នាក់រថភ្លើងនៅតំបន់Stonehaven ចម្ងាយពីទីក្រុង Aberdeen ប្រមាណ១៥គីឡូម៉ែត្រតែប៉ុណ្ណោះ។ ហេតុការណ៍គ្រោះថ្នាក់កើតឡើងនៅវេលាម៉ោង ៩និង៤៣នាទីម៉ោងក្នុងតំបន់ បណ្តាលឲ្យមនុស្ស៣នាក់ស្លាប់នៅនឹងកន្លែង។
សារព័ត៌មានBBCបានផ្សាយថា ហេតុការណ៍រថភ្លើងធ្លាក់កង់ចេញពីផ្លូវ គឺមានទូដឹកអ្នកដំណើរ៤ទូ។ កម្លាំងជួយសង្គ្រោះមានរថយន្តដល់ទៅ៣០គ្រឿង និងឧទ្ធម្ភាគចក្រ២គ្រឿងទៅកាន់តំបន់កើតហេតុ។ សកម្មភាពជួយសង្គ្រោះជួបបញ្ហាយ៉ាងខ្លាំង ដោយសារតែផ្លូវចូលទៅកាន់តំបន់រងគ្រោះជាផ្លូវជ្រោះមានដើមឈើច្រើន ៕ដោយ៖ធី រីណា
