សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ បុរសម្នាក់បានបើកម៉ូតូជ្រុលបុកបង្កាន់ដៃស្ពាន បណ្តាលឲ្យធ្លាក់ចូលទឹកព្រែកទាំងម៉ូតូ ទាំងមនុស្សស្លាប់យ៉ាងអាណោចអាធ័ម កាលពីវេលាម៉ោង ៦ព្រឹកថ្ងៃទី១២ ខែសីហា ឆ្នាំ២០២០នៅ នៅចំណុចស្ពានខាងកើតស្ថានីយ៍សាំងលីគឹមសេង ចម្ងាយប្រហែល ១០០ម៉ែត្រ ស្ថិតនៅភូមិកញ្ចាន់រុន ឃុំប្រាសាទ ស្រុកវ៉ារិន ខេត្តសៀមរាប លើកំណាត់ផ្លូវក្រួសក្រហម ។
សមត្ថកិច្ចនគរបាលចរាចរណ៍ ស្រុកវ៉ារិនបានឲ្យដឹងថា បុរសខាងលើឈ្មោះ ឡុក ក្រួច អាយុ ២៤ឆ្នាំ មានទីលំនៅភូមិគោកភ្នំ ឃុំវ៉ារិន ស្រុកវ៉ារិន ខេត្តសៀមរាប បានបើកបរម៉ូតូម៉ាក HONDA C125 ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ សៀមរាប 1U-7357 ក្នុងល្បឿនលឿន ហើយមកដល់កន្លែងកើតហេតុបានរេចង្កូតធ្លាក់ស្ពានទៅបុកនឹងត្រចៀកស្ពានម្ខាងទៀតធ្លាក់ទាំងមនុស្សនិងម៉ូតូចូលក្នុងទឹកព្រែក បណ្តាលឲ្យលង់ស្លាប់នៅកន្លែងកើតហេតុ ។
ប្រភពដដែលបានឲ្យដឹងទៀតថាក្រោយកើតហេតុ សមត្ថកិច្ចជំនាញចរាចរណ៍បានចុះវាស់វែង ធ្វើកំណត់ហេតុ និងស្រង់សពប្រគល់ជូនក្រុមគ្រួសារយកទៅធ្វើបុណ្យតាមប្រពៃណីនៅឯគេហដ្ឋាន ៕ដោយ៖ប្រាថ្នា
