សារព័ត៌មាន នគរវត្ត តែងតែនាំមុខគេជានិច្ច
ថៃបានចាប់ខ្លួនមេដឹកនាំក្រុមនិស្សិត នៅមុនពេលធ្វើមហាបាតុកម្ម នៅរសៀលថ្ងៃទី១៦ខែសីហាស្អែកនេះ ដើម្បីអំពាវនាវដល់រដ្ឋាភិបាលថៃ លាលែងចេញពីតំណែង ។
តាមប្រព័ន្ធផ្សព្វផ្សាយបានឱ្យដឹងថា លោក Parit Chiwarak ជាបុគ្គលដ៏ល្បីនៅក្នុងការដឹកនាំក្រុមនិស្សិតប្រឆាំងរដ្ឋាភិបាល ហើយលោកត្រូវចាប់ខ្លួននៅថ្ងៃទី ១៤ខែសីហា។ ប៉ូលិសបានបញ្ជាក់ថា លោកParit Chiwarak ប្រឈមនឹងការចោទប្រកាន់១០ករណីផ្សេងគ្នា ពាក់ព័ន្ធនឹងការដឹកនាំធ្វើបាតុកម្ម តាំងពីថ្ងៃទី១៨ខែកក្កដាកន្លងមក។
នៅវេលាម៉ោង១០ព្រឹកថ្ងៃទី១៥ខែសីហា លោកParit Chiwarak ត្រូវបានប៉ូលិសបញ្ជូនទៅកាន់តុលាការនៅរាជធានីបាងកក ដោយមានការការពារសន្តិសុខយ៉ាងតឹងតែងបំផុតព្រោះខ្លាចក្រុមអ្នកគាំទ្ររូបលោកសម្រុកចូលមក មិនអាចការពារបាន។
នៅរសៀលថ្ងៃទី១៥ ខែសីហានេះលោកParit Chiwarak ត្រូវបានតុលាការដោះលែងឲ្យមានសេរីភាពជាបណ្តោះអាសន្ន ក្រោយទទួលបានការធានាពីសាស្ត្រាចារ្យនៃមហាវិទ្យាល័យ Thammasat ដែលមានតួនាទីជាមន្ត្រីជាតិជាន់ខ្ពស់។
តាមគម្រោងក្រុមនិស្សិតប្រមាណ១ម៉ឺននាក់នឹងនាំគ្នាធ្វើបាតុកម្មនៅថ្ងៃទី១៦ខែសីហានេះ ដើម្បីប្រឆាំង នឹងសកម្មភាពដឹកនាំរបស់រដ្ឋាភិបាលរបស់នាយករដ្ឋមន្ត្រីប្រាយុទ្ធចាន់អូចា និងស្នើឲ្យរដ្ឋាភិបាលលាលែងចេញពីតំណែង។
ដោយប្រឈមមុខនឹងការធ្វើបាតុកម្ម លោកប្រាយុទ្ធបានប្រកាសទៅកាន់មហាជនថានឹងបង្កើតវេទិកាបញ្ចេញមតិដើម្បិស្តាប់ការលើកឡើងរបស់ពលរដ្ឋ ៕ដោយ៖ធី រីណា
