សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនម្នាក់បានបើករថយន្ត គេចពីឡំប្រឺតាបានជ្រុលចង្កូតទៅបុករបាំងថ្មពុះចែកទ្រូងផ្លូវបាក់អស់មួយកង់ ហើយរថយន្តខ្ទាតទៅប៉ះរ៉ឺម៉កម៉ូតូមួយគ្រឿងទៀតបណ្ដាលឲ្យរថយន្តដាច់កាឡេទៅមុខលែងរួច។
ហេតុការណ៍នេះបានកើតឡើងនៅវេលាម៉ោង ៣ និង៣០នាទីទៀបភ្លឺឈានចូលថ្ងៃទី ២៥ ខែសីហា ឆ្នាំ ២០២០ នៅតាមបណ្ដោយផ្លូវលេខ២៨៩ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញរថយន្តម៉ាកតូយ៉ូតាហាយឡេនឌ័រ ពណ៌ស ពាក់ស្លាកលេខភ្នំពេញ 2AT-3525បើកបរដោយយុវជនម្នាក់ និងមានអ្នករួមដំណើរម្នាក់ បើកបណ្ដោយផ្លូវលេខ២៨៩ ក្នុងទិសដៅពីត្បូងទៅជើង ខណៈមកដល់កន្លែងកើតហេតុ អ្នកបើកបរបានបួងចង្កូតគេចពីឡំប្រឺតា១គ្រឿងក៏ជ្រុលទៅបុកក្បាលនាគពុះចែកទ្រូងផ្លូវបាក់អស់មួយកង់ ហើយរថយន្តបានខ្ទាតទៅប៉ះនឹងរ៉ឺម៉កម៉ូតូមួយគ្រឿងបណ្តាលឲ្យរថយន្តដាច់កាឡេកង់ទៅមុខលែងរួច ហើយសំណាងល្អដែរដែលនៅក្នុងហេតុការណ៍នេះមិនបណ្តាលឲ្យមានអ្នករងរបួស។
បន្ទាប់ពីកើតហេតុ សមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចរាចរណ៍ឱ្យចុះមកស្ទូចយករថយន្តទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំដោះស្រាយគ្នានៅពេលក្រោយ៕ ជ្រោយពេជ្រ
