សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី៣ ខែកញ្ញា ផ្កាយរណបដំបូងគេបង្អស់របស់កម្លាំងទាហានអាកាសថៃ មានឈ្មោះថា ណាប៉ា-១ (Napa-1) ត្រូវបានបញ្ជូនទៅកាន់គន្លងតារាវិថីដោយជោគជ័យ ដែល ប្រើប្រាស់រ៉ុក្កែតរុញArianespace Vega របស់អឺរ៉ុប ដោយបាញ់ចេញពីទឹកដីបារាំងឯនាយសមុទ្រ គឺ Guyana។
ការបញ្ជូនផ្កាយរណបនេះគឺធ្វើឡើងនៅវេលាម៉ោង៨និង១៥នាទី ម៉ោងនៅទីក្រុងបាងកក ដោយបាញ់ចេញពីមជ្ឈមណ្ឌលអវកាស Guyana របស់បារាំង។ ប្រព័ន្ធផ្សព្វផ្សាយថៃបានផ្សាយថាផ្កាយរណប Napa-1 បានបញ្ជូនទៅទីអវកាស ព្រមជាមួយផ្កាយរណបចំនួន៥៣ផ្សេងទៀត របស់១៣ប្រទេសដែលមានតម្រូវការបញ្ជូនផ្កាយរណប។ ក្នុងចំណោមផ្កាយរណបទាំងនោះមាន៧គ្រឿងប្រភេទ(microsatellite) មានទម្ងន់តែ១៥គីឡូក្រាមតែប៉ុណ្ណោះ និងផ្កាយរណប(nanosatellite) ចំនួន៤៦គ្រឿង។
ផ្កាយរណប Napa-1 របស់ទាហានអាកាសថៃ គឺជាផ្កាយរណបខ្នាតតូចមួយដែលបានបាញ់បង្ហោះទៅក្នុងគន្លងផែនដីទាបដើម្បីធ្វើការអង្កេតនិងស្ទង់មើលដែនអាកាសថៃសម្រាប់គោលបំណងការពារសន្តិសុខជាតិ។
ផ្កាយរណបខាងលើ ក្រៅពីបម្រើក្នុងវិស័យសន្តិសុខការពារជាតិ នៅអាចជួយក្នុងសកម្មភាពជួយសង្គ្រោះ ស្វែងរក ក្នុងហេតុការណ៍គ្រោះថ្នាក់ធម្មជាតិ។ ក្រៅពីនេះក៏តាមដានភ្លើងឆេះព្រៃផងដែរ និងគ្រោះរាំងស្ងួត ទឹកជំនន់៕ដោយ៖ធី រីណា
