សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជានិស្សិតឆ្នាំទី៣ម្នាក់ ដោយសារតែជំងឺគាំងបេះដូង បានដេកស្លាប់នៅក្នុងបន្ទប់ជួលជាន់ទី ៣ បង្កឲ្យភ្ញាក់ផ្អើលដល់បងប្អូនប្រជាពលរដ្ឋនៅម្តុំនោះ ។
ហេតុការណ៍នេះបង្កឲ្យមានការភ្ញាក់ផ្អើលឡើងនៅម៉ោង ១០និង៣០នាទីព្រឹកថ្ងៃទី ៦ ខែកញ្ញា ឆ្នាំ ២០២០ នៅតាមបណ្តោយផ្លូវបេតុង ក្នុងភូមិបុរី១០០ខ្នង សង្កាត់ទឹកថ្លា ខណ្ឌសែនសុខ រាជធានីភ្នំពេញ។
សមត្ថកិច្ចបានឲ្យដឹងថាសពមានឈ្មោះ ពញ្ញា អាយុ២២ឆ្នាំ ជានិស្សិតឆ្នាំទី៣ រស់នៅភូមិត្រើយឃ្លោក ឃុំដូនខ្ពស់ ស្រុកបុរីជលសារ ខេត្តតាកែវ។
ប្រភពព័ត៌មានពីម្ចាស់ផ្ទះបានឲ្យដឹងថា មុនពេលកើតហេតុគាត់បានឃើញមិត្តភក្តិ រួមការងារជាមួយជនរងគ្រោះ បានមកប្រាប់គាត់ថាគេបានតេទៅជនរងគ្រោះ ជាច្រើនដងតែអត់លើកទូរស័ព្ទសោះ ទើបនាំគ្នាឆ្ងល់ហើយក៏សម្រេចចិត្តនាំគ្នាឡើងទៅគោះទ្វារបន្ទប់ជាច្រើនដងអត់ភ្ញាក់ទៀត ក៏នាំគ្នាធាក់ទ្វារចូលទៅឃើញជនរងគ្រោះដេកស្លាប់រឹងខ្លួនបាត់ទៅហើយ។ពេលឃើញសភាពដូចនេះក៏បានទំនាក់ទំនងទៅសមត្ថកិច្ចចុះមកពិនិត្យ។
បន្ទាប់ពីកើតហេតុ សមត្ថកិច្ចបានទំនាក់ទំនងទៅខាងជំនាញកោសល្យវិច័យឲ្យចុះមកពិនិត្យ ហើយបានបញ្ជាក់ប្រាប់ថា ជនរងគ្រោះស្លាប់ដោយសារតែជំងឺគាំងបេះដូង រួចក៏ធ្វើកំណត់ហេតុប្រគល់សពជូនទៅឱ្យក្រុមគ្រួសារយកទៅធ្វើបុណ្យតាមប្រពៃណីនៅឯខេត្តតាកែវ៕ ដោយ៖ ជ្រោយពេជ្រ
