សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យ២នាក់បានធ្វេីសកម្មភាពឆក់យកទូរស័ព្ទដៃម៉ាកអាយហ្វូនសុិចពីនារីម្នាក់បានសម្រេច កាលពីវេលាម៉ោង១០ និង៣០នាទីយប់ ថ្ងៃទី៩ ខែកញ្ញា ឆ្នាំ២០២០ នៅតាមផ្លូវបេតុងក្នុងភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ រួចពួកគេបានជិះម៉ូតូគេចខ្លួនទៅដល់ផ្លូវទាល់ក្នុងភូមិអូរបែកក្អម សង្កាត់អូរបែកក្អម ខណ្ឌសែនសុខ ក៏ត្រូវបានកម្លាំងនគរបាលប៉ុស្ដិ៍រដ្ឋបាលអូរបែកក្អមនៃអធិការដ្ឋាននគរបាលខណ្ឌសែនសុខ ធ្វើការឃាត់ខ្លួនជនសង្ស័យទាំង២នាក់នៅយប់កេីតហេតុភ្លាមៗតែម្ដង ។
សមត្ថកិច្ចបានឲ្យដឹងថា ជនសង្ស័យទាំង២នាក់ដែលឃាត់ខ្លួនបានរួមមាន ៖ ទី១-ឈ្មោះ ឈួន ចិន ភេទប្រុស អាយុ១៨ឆ្នាំ មុខរបរមិនពិតប្រាកដស្នាក់នៅភូមិថ្មគោល សង្កាត់ចោមចៅទី១ ខណ្ឌពោធិ៍សែនជ័យ មានសារធាតុញៀនជាប់នឹងខ្លួន និងទី២-ឈ្មោះ រឹម តុលា ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ។ ចំណែកនារីរងគ្រោះមានឈ្មោះជឹម ចាន់ណា អាយុ២៥ឆ្នាំ មុខរបរជាបុគ្គលិកនៅភោជនីយដ្ឋានមួយកន្លែង ស្នាក់នៅភូមិអូរបែកក្អម សង្កាត់អូរបែកក្អម ខណ្ឌសែនសុខ។
សមត្ថកិច្ចបានឲ្យដឹងទៀតថា មុនពេលកើតហេតុស្ត្រីរងគ្រោះបានចេញពីធ្វើការនៅហាង រួចដើរតាមផ្លូវបំណងទៅផ្ទះ ហើយបាននិយាយទូរស័ព្ទជាមួយមិត្តភក្កិ ស្របពេលនោះក៏មានជនសង្ស័យ២នាក់ជិះម៉ូតូមួយគ្រឿងម៉ាកស្គូពី ពណ៌ស ពាក់ស្លាកលេខភ្នំពេញ 1HB-8594 ធ្វើដំណើរមកពីក្រោយក៏បានធ្វើសកម្មភាពឆក់យកទូរស័ព្ទដៃម៉ាកអាយហ្វូនស៊ិចពីនារីរងគ្រោះបានសម្រេច រួចជិះម៉ូតូបំណងគេចខ្លួនទៅដល់ផ្លូវទាល់ ទេីបជនសង្ស័យទាំង២នាក់បត់ត្រឡប់ក្រោយវិញ ពេលនោះនារីរងគ្រោះបានឈរពីមុខម៉ូតូរបស់ជនសង្ស័យធ្វេីឲ្យជនសង្ស័យទាំងពីរនាក់ជិះម៉ូតូបំបុកបណ្ដាលឲ្យនារីរងគ្រោះដួលសន្លប់ស្តូកស្តឹងនៅកន្លែងកើតហេតុ ពេលនោះក៏មានការភ្ញាក់ផ្អើលដល់សមត្ថកិច្ចប៉ុស្តិ៍នគរបាលអូរបែកក្អម ជួយដេញចាប់បានជនសង្ស័យ២នាក់ភ្លាមយកទៅសួរនាំ ។
ចំណែកនារីរងគ្រោះត្រូវបានសមត្ថកិច្ចនគរបាលប៉ុស្តិ៍អូរបែកក្អម ហៅរថយន្តសង្គ្រោះរបស់មន្ទីរពេទ្យឯកជនដឹកយកទៅសង្គ្រោះនៅមន្ទីរពេទ្យភ្លាមៗផងដែរ ។
នៅចំពោះមុខសមត្ថកិច្ចប៉ុស្តិ៍នគរបាលអូរបែកក្អម ជនសង្ស័យ២នាក់បានឆ្លើយសារភាពថា ពួកគេពិតជាបានធ្វើសកម្មភាពឆក់ទូរស័ព្ទរបស់នារីរងគ្រោះពិតប្រាកដមែន តែមិនមែនឆក់នៅក្នុងទឹកដីប៉ុស្តិ៍នគរបាលអូរបែកក្អមទេ គឺនៅតាមផ្លូវបេតុងភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ។ ពេលនោះសមត្ថកិច្ចប៉ុស្តិ៍នគរបាលអូរបែកក្អមក៏បានទំនាក់ទំនងទៅសមត្ថកិច្ចនគរបាលស្ទឹងមានជ័យទី៣ឲ្យមកយកជនសង្ស័យទាំងពីរនាក់ទៅសាកសួរបន្តតាមនីតិវិធី ។
បច្ចុប្បន្ននេះ ជនសង្ស័យទាំង២នាក់ខាងលេី ត្រូវបានសមត្ថកិច្ចប៉ុស្ដិ៍នគរបាលស្ទឹងមានជ័យទី៣ កំពុងសាកសួរ និងកសាងសំណុំរឿងបញ្ជូនទៅកាន់អធិការដ្ឋាននគរបាលខណ្ឌមានជ័យ ដេីម្បីចាត់ការតាមច្បាប់ ៕ដោយ៖ ភារ៉ា ដង្កោ
