សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យ៉ាងហោចណាស់ក៏មានមនុស្សប្រុសស្រីចំនួន៧នាក់ដែរបានរងរបួសធ្ងន់និងស្រាលត្រូវបានរថយន្តសង្គ្រោះរបស់កងពលតូច៧១១ដឹកយកទៅសង្គ្រោះភ្លាមៗបន្ទាប់ពីបេីករថយន្តដឹកសម្ភារតុការនិងដែកសង់រោងបើកតាមផ្លូវហេីយគេចពីម៉ូតូដែលនៅខាងមុខបួងចង្កូតខ្លាំងពេកក៏ក្រឡាប់ផ្ងារជេីង កាលពីវេលាម៉ោង៥ល្ងាចថ្ងៃទី១២ ខែកញ្ញា ឆ្នាំ២០២០ នៅលេីកំណាត់ផ្លូវជាតិលេខ៣ ក្នុងសង្កាត់ពងទឹក ខណ្ឌដង្កោ រាជធានីភ្នំពេញ។
តាមសាក្សីនៅកន្លែងកេីតហេតុបានឲ្យដឹងថា មុនពេលកេីតហេតុគេបានឃេីញ រថយន្តកូរ៉េ ពណ៌ខៀវ ពាក់ស្លាកលេខ ទ១៧៩៥ ភព២ ដឹកសម្ភារតុចានឆ្នាំង និងរោងការបុណ្យ ធ្វេីដំណេីរតាមបណ្តោយផ្លូវជាតិលេខ៣ក្នុងទិសដៅពីត្បូងទៅជេីងក្នុងល្បឿនលឿន ខណៈមកដល់ចំណុចកេីតហេតុក៏មានម៉ូតូមួយគ្រឿងបេីកបរនៅខាងមុខដោយជ្រែចុះជ្រែឡេីងធ្វេីឲ្យរថយន្តគេចបួងចង្កូតខ្លាំងពេកក៏ក្រឡាប់ផ្ងារជេីងតែម្តងនិងរបួសមនុស្សប្រុសស្រីចំនួន៧នាក់។
ក្រោយពេលកេីតហេតុជនរងគ្រោះត្រូវបានរថយន្តសង្គ្រោះកងពលតូចលេខ៧១១ ដឹកយកទៅសង្គ្រោះភ្លាមៗ ចំណែករថយន្តដោយសារតែមិនបានប៉ះពាល់ដល់អ្នកដទៃនិងទ្រព្យសម្បត្តិរដ្ឋសមត្ថកិច្ចក៏ប្រគល់ឲ្យយកទៅជួសជុលខ្លួនឯងវិញ៕
ដោយ៖ សុខាសែនជ័យ
