សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ នៅថ្ងៃចន្ទទី១៤ ខែកញ្ញា ឆ្នាំ២០២០នេះ លោកស្រីចាស៊ីនដា អាឌើន (Jacinda Ardern) នាយករដ្ឋមន្ត្រីនូវែលហ្សេឡង់ បានលើកឡើងថាប្រទេសរបស់ខ្លួន នឹងលើកចោលការរឹតត្បិតនៅទូទាំងប្រទេសត្រឹមថ្ងៃទី២១ខែកញ្ញាខាងមុខនេះ ។ ប៉ុន្តែទីក្រុង Auckland ដែលជាកន្លែងផ្ទុះCOVID-19 ចុងក្រោយ នៅតែបន្តស្ថិតក្រោមការរឹតត្បិតដដែល។
បើតាមការអះអាងរបស់លោកស្រីនាយករដ្ឋមន្ត្រី ចាស៊ីនដា អាឌើន សម្រេចលុបចោលការរឹតត្បិត ការរក្សាគម្លាតលើយន្តហោះ និងមធ្យោបាយដឹកជញ្ជូនសាធារណៈទាំងអស់នៅក្នុងប្រទេស។ ចំណែកទីក្រុងAuckland រដ្ឋាភិបាលនឹងពិចារណា នៅសប្តាហ៍ក្រោយ។ ខណៈករណីឆ្លងបានធ្លាក់ចុះមកក្នុងចំនួនតិចតួច ដែលមានករណីឆ្លង មួយ ឬពីរករណីក្នុងមួយថ្ងៃ នូវែលហ្សេឡង់ បានសម្រេចលើកចោល ការរឹតត្បិតនៅក្នុងប្រទេសនាថ្ងៃទី២១ ខែកញ្ញាខាងមុខ។
បើតាម លោក Jami-Lee Ross អ្នករៀបចំឲ្យមានការតវ៉ាម្នាក់ និងជាមេដឹកនាំរបស់បក្សនូវែលហ្សេឡង់ចម្រើនទៅមុខ (Advance New Zealand party) បានអះអាងថា៖ នៅថ្ងៃចុងសប្តាហ៍កន្លងទៅ មនុស្សជាច្រើនពាន់នាក់នៅក្នុងទីក្រុងAuckland បានជួបប្រជុំគ្នា ដើម្បីប្រឆាំងនឹងវិធានការរឹតត្បិតរបស់រដ្ឋាភិបាល ដោយក្រុមតវ៉ាមិនបានគោរពវិធានការរក្សាគម្លាត ឬការពាក់ម៉ាស់អ្វីឡើយ។ «យើងនៅកន្លែងនេះ ក្នុងថ្ងៃនេះ ដោយសារយើងជឿថា យើងត្រូវការក្រោកឈរទាមទារ សិទ្ធិរបស់ពួកយើង»។
គួរបញ្ជាក់ថា ទីក្រុង Auckland ត្រូវបានរាយការណ៍ថាគឺជាកន្លែងផ្ទុះCOVID-19 ចុងក្រោយរបស់នូវែលហ្សេឡង់។ ករណីផ្ទុះដំបូង នៅក្នុងទីក្រុងមួយនេះ មិនទាន់ត្រូវបានគេរកឃើញប្រភពចម្លងនៅឡើយទេ បើទោះបីជាអាជ្ញាធរសុខាភិបាល បានដាក់ការសង្ស័យលើឃ្លាំងក្លាសេមួយកន្លែងក៏ដោយ។ ជាមួយវិធានការរឹតត្បិត និងទប់ស្កាត់ COVID-19 នូវែលហ្សេឡង់ បានទប់ស្កាត់COVID-19 បានល្អប្រសើរនៅក្នុងប្រទេស។
បើគិតមកត្រឹមថ្ងៃទី១៤ ខែកញ្ញានេះ ប្រទេសនូវែលហ្សេឡង់ មានករណីឆ្លងCOVID-19 សរុបចំនួន ១៧៩៨ករណី អ្នកស្លាប់មានចំនួន ២៤នាក់ខណៈអ្នកជាសះស្បើយមានចំនួន ១៦៧៨នាក់៕
ដោយ៖ស តារា
