សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ នៅព្រឹកថ្ងៃទី២២ ខែកញ្ញា ឆ្នាំ២០២០ លោក ផាន់ ចាន់ធុល អភិបាលខេត្តប៉ៃលិន អមដំណើរដោយមន្រ្តីជំនាញ និងអាជ្ញាធរមូលដ្ឋាន ព្រមទាំងក្រុមការងារ បានអញ្ជើញចុះពិនិត្យមើលទីតាំងដាក់លូបង្ហូរទឹកអមសងខាងផ្លូវជាតិលេខ៥៧ ស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន និងបានធ្វើការណែនាំដល់បងប្អូនប្រជាពលរដ្ឋ កុំអោយចាក់ដី និងសាបបេតុងលើគម្របលូ ដែលធ្វើអោយស្ទះប្រព័ន្ធបង្ហូរទឹក ងាយបង្ករជាជំនន់ទឹកភ្លៀងកើតមានឡើង ជាហេតុធ្វើឱ្យលិចលំនៅដ្ឋានរបស់ប្រជាពលរដ្ឋ។
លោក ផាន់ ចាន់ធុល អភិបាលខេត្តប៉ៃលិន បានមានប្រសាសន៍លើកឡើងថា៖ កន្លងមកដោយមើលឃើញថា តាមដងផ្លូវជាតិលេខ ៥៧ នៅចំនុចភូមិផ្សារព្រំ កន្លែងខ្លះមានទឹកហូរលើផ្លូវនៅពេល មានភ្លៀងធ្លាក់ម្តងៗ ដែលជាហេតុធ្វើអោយផ្លូវឆាប់ខូច និងធ្វើអោយស្ទះប្រព័ន្ធបង្ហូរទឹក ងាយបង្ករជាជំនន់ទឹកភ្លៀងកើតមានឡើង ជាហេតុធ្វើឱ្យលិចលំនៅដ្ឋានរបស់ប្រជាពលរដ្ឋ ដោយសារបងប្អូនប្រជាពលរដ្ឋយើងខ្លះ បានចាក់សំរ៉ាម ចាក់ដី និងសាបបេតុងលើគម្របលូ ហើយជាក់ស្តែងនៅពេលនេះ អាជ្ញាធរខេត្ត និងមន្ត្រីជំនាញ នៃមន្ទីរសាធារណៈការ និងដឹកជញ្ជូនខេត្ត បានចុះសិក្សា និងពិនិត្យមើលជាក់ស្តែង ដើម្បីធ្វើការកាយដាក់ប្រព័ន្ធលូបង្ហូរទឹកនៅកន្លែងដែលស្ទះទឹក ដើម្បីរំដោះទឹកកុំអោយហូរលើដងផ្លូវដែលធ្វើអោយឆាប់ខូចផ្លូវ និងបាត់បង់នូវសោភណ្ឌភាពនៅតាមដងផ្លូវសាធារណៈផងដែរ។
លោក អភិបាលខេត្ត បានមានប្រសាសន៍បញ្ជាក់ថា៖ នៅពេលដែលមន្ត្រីជំនាញ ចុះកាយដាក់ប្រព័ន្ធលូបង្ហូរទឹក សូមអោយមន្រ្តីជំនាញ និងអាជ្ញាធរមូលដ្ឋាន ចុះសម្របសម្រួល ជាមួយបងប្អូនប្រជាពលរដ្ឋ ដែលរស់នៅក្បែរប្រព័ន្ធលូបង្ហូរទឹកសងខាងផ្លូវ ដែលរងការប៉ះពាល់ ឱ្យពួកគាត់ចូលរួមសហការជាមួយមន្រ្តីជំនាញ ដើម្បីធ្វើការដោះស្រាយបញ្ហាស្ទះប្រព័ន្ធលូរបង្ហូរទឹកនេះឡើងវិញ បានឆាប់រហ័ស។
នៅក្នុងឱកាសនោះផងដែរ លោក ផាន់ ចាន់ធុល ក៍បានណែនាំដល់បងប្អូនប្រជាពលរដ្ឋដែលរស់នៅអមសងខាងផ្លូវ កុំចាក់ សំរ៉ាម និងចាក់ដីលើ គម្រប់លូបង្ហូរទឹក ដែលជាហេតុធ្វើអោយស្ទះប្រព័ន្ធលូរ ហើយចូលរួមជួយថែរក្សា ដើម្បីធានាដល់ការប្រើប្រាស់យូអង្វែង និងសោភ័ណ្ឌភាពសាធារណៈ។
បើតាមការបញ្ជាក់របស់លោក អ៊ាត សារ៉ាត់ ប្រធានមន្ទីរសាធារណៈការ និងដឹកជញ្ជូនខេត្ត បានឱ្យដឹងថា៖ ការជួសជុលប្រព័ន្ធលូបង្ហូរទឹកនៅសងខាងផ្លូវជាតិលេខ ៥៧ នៅចំនុចភូមិផ្សារព្រំ ឃុំស្ទឹងកាច់ ក្បែរច្រកទ្វារព្រំដែនអន្តរជាតិព្រំ គឺគ្រោងដាក់ប្រព័ន្ឋលូប្រអប់រំដោះទឹក ១៥០ម មុខកាត់ ២ម X ២ម និងធ្វើការស្ដារប្រឡាយដីប្រវែង ៣០០ម៕
ដោយ៖ សិលា
