សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នាព្រឹកថ្ងៃទី២៤ ខែកញ្ញា ឆ្នាំ២០២០នេះ តាមរយៈបណ្តាញទំនាក់ទំនងសង្គមហ្វេសប៊ុក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា »ថ្ងៃទី ២៤ ខែ កញ្ញា ឆ្នាំ ២០២០ នេះគឺជាថ្ងៃឈប់សម្រាកអបអរសាទរ “ទិវាប្រកាសរដ្ឋធម្មនុញ្ញនៃព្រះរាជាណាចក្រកម្ពុជា” (២៤ កញ្ញា ១៩៩៣ – ២៤ កញ្ញា ២០២០) ដែលប្រទេសកម្ពុជាបានវិលត្រឡប់មកកាន់ “ព្រះរាជាណាចក្រកម្ពុជា” សារជាថ្មីឡើងវិញ ក្រោយពីយើងបានបញ្ចប់សង្រ្គាមស៊ីវិល នឹងមានការបោះឆ្នោតដោយសេរីលើកទី១នៅឆ្នាំ ១៩៩៣។
សូមរំឮកថា៖ សម្តេចតេជោ ហ៊ុន សែន អរគុណដល់បងប្អូនជនរួមជាតិដែលបានគាំទ្រសារនយោបាយរបស់សម្តេច គឺ «អរគុណសន្តិភាព»។
ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានផ្ញើសារជាថ្មីម្តងទៀត អរគុណដល់បងប្អូនជនរួមជាតិដែលបានគាំទ្រសារនយោបាយរបស់សម្តេច គឺ «អរគុណសន្តិភាព» ដែលសម្តេចយល់ថា មានតម្លៃមិនសាបសូន្យមិនថាកន្លងមក ថ្ងៃនេះ និងថ្ងៃក្រោយ។
សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានថ្លែងថា៖ ជនរួមជាតិជាទីស្នេហា ជាថ្មីម្តងទៀត ខ្ញុំព្រះករុណាខ្ញុំ សូមថ្លែងអំណរគុណ ដល់បងប្អូនជនរួមជាតិ ដែលបាន គាំទ្រដល់សារនយោបាយរបស់ខ្ញុំគឺ “អរគុណសន្តិភាព” ដែលខ្ញុំយល់ថា មានតម្លៃមិនសាបសូន្យ មិនថាកន្លងមក ថ្ងៃនេះ និងថ្ងៃក្រោយ។ មនុស្សទាំងអស់គ្នាត្រូវការសន្តិភាព លើកលែងតែពួក ភេរវករប៉ុណ្ណោះដែលចង់បំផ្លាញសន្តិភាព។ “អរគុណសន្តិភាព” បានក្លាយទៅជាពាក្យស្លោករបស់ ប្រជាជនដែលស្រឡាញ់សន្តិភាព។
សម្តេចបន្តថា៖ នៅទីបញ្ចប់ខ្ញុំព្រះករុណាខ្ញុំ សូមប្រសិទ្ធពរជូនជនរួមជាតិជាទីស្នេហា សូមបានប្រកបដោយ ពុទ្ធពរទាំងបួន [ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕
ដោយ៖ សុខ ខេមរា
