រថយន្តកាមរីបុក២នាក់ប្តីប្រពន្ធកំពុងជិះម៉ូតូពីក្រោយបណ្ដាលឲ្យស្លាប់ទាំង២នាក់

ខេត្តបន្ទាយមានជ័យ៖ ពិតជាគួរឲ្យសង្វេគខ្លាំងណាស់ដែលប្តីប្រពន្ធពីរនាក់បានស្លាប់ដោយសារតែរថយន្តម៉ាកកាមរីបុកពីក្រោយខណៈកំពុងជិះម៉ូតូកាលពីវេលាម៉ោង៧ព្រឹកថ្ងៃទី២៥ ខែកញ្ញា ឆ្នាំ២០២០ លើកំណាត់ផ្លូវជាតិលេខ៥ ស្ថិតក្នុងភូមិយាងថ្មី ឃុំកូប ស្រុកអូរជ្រៅ ខេត្តបន្ទាយមានជ័យ។
លោកសួន នីប៉ូ នាយរងការិយាល័យ បានឲ្យដឹងថា ជនរងគ្រោះអ្នកបើកបរម៉ូតូឈ្មោះតុប យ៉ាន ភេទប្រុស អាយុ៦៧ឆ្នាំជាប្តី និងអ្នករួមដំណើរជាប្រពន្ធឈ្មោះម៉ៅ យុង អាយុ៦៩ឆ្នាំ រស់នៅភូមិសូរិយាថ្មី ឃុំកូប ស្រុកអូរជ្រៅ ខេត្តបន្ទាយមានជ័យ (ស្លាប់ទាំង២នាក់នៅកន្លែងកើតហេតុ) ។
លោកបញ្ជាក់ថា នៅមុនពេលកើតហេតុ មានម៉ូតូមួយគ្រឿងម៉ាកហុងដាឌ្រីម ពាក់ស្លាកលេខ ប.មានជ័យ 1V. 4443 បើកបរដោយឈ្មោះតុប យ៉ាន ពេលបើកដល់ចំណុចកើតហេតុត្រូវរថយន្តមួយគ្រឿង ម៉ាកតូយ៉ូតាកាមរី ពណ៌ទឹកសមុទ្រ ផលិតឆ្នាំ1995ពាក់ស្លាកលេខភ្នំពេញ.2E -2717 បានបុកចំពីក្រោយបណ្តាលឲ្យស្លាប់ទាំង២នាក់ប្តីប្រពន្ធនៅនឹងកន្លែងតែម្ដង ។ចំណែកអ្នកបើកបររថយន្តមិនស្គាល់អត្តសញ្ញាណបានរត់គេចខ្លួនបាត់ បន្សល់ទុកតែរថយន្តនៅកន្លែងកើតហេតុ ។មូលហេតុ អ្នកបើកបររថយន្តបើកបរក្នុងល្បឿនលឿន។ បច្ចុប្បន្នវត្ថុតាងម៉ូតូនិងរថយន្តត្រូេវសមត្ថកិច្ចជំនាញយកមករក្សាទុកនៅអធិការដ្ឋាននគរបាលស្រុកអូរជ្រៅ ដើម្បីរកម្ចាស់រថយន្តមកដោះស្រាយចំពោះមុខច្បាប់។ចំណែក សពជនរងគ្រោះត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រណៃណី ក្រោយពេលនគរបាលជំនាញពិនិត្យរួច៕ដោយ៖ វណ្ណា