សារព័ត៌មាន នគរវត្ត តែងតែនាំមុខគេជានិច្ច
ភ្នំពេញសមត្ថកិច្ចនគរបាលប៉ុស្តិ៍រដ្ឋបាលព្រែកថ្មីបានឃាត់ខ្លួនបុរសម្នាក់ ដែលប៉ុនប៉ងលួចម៉ូតូគេ និងប្រើប្រាស់ ដោយខុសច្បាប់នូវសារធាតុញៀន កាលពីម៉ោង១០និង៣០នាទីព្រឹក ថ្ងៃទី២៩ ខែកញ្ញា ឆ្នាំ២០២០នៅមុខដីឡូត៍គ្មានលេខ ផ្លូវលេខ១១២ ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ ។
សមត្ថកិច្ចបានឲ្យដឹងថា ជនសង្ស័យឈ្មោះសុខ រ៉ា អាយុ២៩ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅភូមិចំពុះក្អែក សង្កាត់ព្រែកថ្មី ខណ្ឌ ច្បារអំពៅ។
សមត្ថកិច្ចបានឲ្យដឹងទៀតថា មុនពេលឃាត់ខ្លួនជនសង្ស័យ សមត្ថកិច្ចយើងបានល្បាតក្នុងមូលដ្ឋាន ពេលមកដល់ចំណុចកើតហេតុ ក៏ឃើញជនសង្ស័យកំពុងឈរ រេរាគួរឱ្យសង្ស័យក៏ឃាត់ត្រួតពិនិត្យរកឃើញវត្ថុតាង រួមមាន ដែកកែច្នៃចុងស្រួចសម្រាប់កាច់សោម៉ូតូចំនួន១, កូនសោខ្សៀលេខ១០ចំនួន១ និងម្សៅក្រាមពណ៌សថ្លា (សង្ស័យគ្រឿងញៀន)១ថង់តូចនៅក្នុងហោប៉ៅខោជនសង្ស័យ ក៏ឃាត់ខ្លួន រួមនឹងវត្ថុតាងនាំមកអធិការដ្ឋាន នគរបាលខណ្ឌច្បារអំពៅដើម្បីចាត់ការតាមច្បាប់។
បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌច្បារអំពៅ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី៕
ដោយ៖ជ្រោយពេជ្រ
