សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមការប្រកាសរបស់អង្គការសង្គមអេដស៍អន្តរជាតិ (IAS) នៅថ្ងៃទី៣០ ខែកញ្ញាម្សិលមិញនេះថា លោក Timothy Ray Brown ជនជាតិអាមេរិក គឺជាមនុស្សទីមួយដែលព្យាបាលជាសះស្បើយពីជំងឺអេដស៍អស់រយៈពេល១២ឆ្នាំក្រោមមក ក៏បានទទួលមរណភាពដោយសារជំងឺមហារីកឈាម (leukemia) ។
អង្គការសង្គមអេដស៍អន្តរជាតិ (IAS) បន្តថា លោក Brown ដែលស្គាល់ថា«អ្នកជំងឺបែរឡាំង» ត្រូវបានប្រកាសថាជាសះស្បើយពីជំងឺអេដសន៍ក្នុងឆ្នាំ២០០៨ ។ មួយឆ្នាំមុនការប្រកាសនេះ លោក Brown ត្រូវបានវះកាត់ប្តូរខួរឆ្អឹង ក្នុងទីក្រុង បែរឡាំង ប្រទេស អាល្លឺម៉ង់ ដើម្បីព្យាបាលជំងឺឈាមសស៊ីឈាមក្រហម (acute myeloid leukemia)។ ព្រោះខួរឆ្អឹងដែលលោកទទួលបាននោះ គឺផ្ទុកហ្សែនកម្រម្យ៉ាងដែលប្រឆាំងនឹងវីរុសហ៊ីវ(HIV) ស្គាល់ថា CCR5-delta 32 ។ វាបានផ្ទេរទៅឲ្យលោក Brown។នេះមានន័យថា លោកលែងត្រូវថ្នាំប្រឆាំងវីរុសហើយលោកបន្តគ្មានវីរុសដែលបង្កទៅជាជំងឺអេដស៍ រហូតមក។ ក្នុងពេល៦ខែចុងក្រោយ ជំងឺមហារីកឈាមលោក បានងើបឡើងវិញហើយបានជ្រាបចូលដល់ឆ្អឹងខ្នង និងខួរក្បាល។
បន្ថែមពីនេះអង្គការIAS បានប្រកាសពីការស្លាប់របស់លោក Brown នៅថ្ងៃទី៣០ ខែកញ្ញា ឆ្នាំ២០២០ ហើយបានចូលរួមរំលែកទុក្ខជាមួយក្រុមគ្រួសាររបស់លោកផងដែរ។ លោក Brown អាយុ៥៤ឆ្នាំ ដែលកើតក្នុងសហរដ្ឋអាមេរិក បានកើតជំងឺអេដស៍ ខណៈលោកបានរស់នៅក្នុងទីក្រុងបែរឡាំងក្នុងឆ្នាំ១៩៩៥។ ហើយក្នុងឆ្នាំ២០០៧ លោកបានកើតជំងឺមហារីកឈាម។
នៅទូទាំងពិភពលោក មនុស្ស៣៨លាននាក់ កំពុងរស់នៅជាមួយជំងឺអេដស៍។ នេះបើតាមអង្គការសហប្រជាជាតិ ។ ករណីជាសះស្បើយរបស់លោកBrown បានផ្ដល់ក្តីសង្ឃឹមឲ្យពិភពលោកថា ការព្យាបាលជំងឺអេដស៍អាចធ្វើទៅបាន។
គួរបញ្ជាក់ថា មនុស្សទី២ដែលជាសះស្បើយពីជំងឺអេដស៍ត្រូវបានប្រកាសកាលពីដើមឆ្នាំ២០២០នេះ។ គឺលោក Adam Castillejo ដែលស្គាល់ថា«អ្នកជំងឺឡុងដ៍» បានទទួលការព្យាបាលស្រដៀងគ្នាទៅនឹងលោក Brown ៕ដោយ៖ស តារា
